नेपाली राष्ट्रिय फुटबल टोली र अफ्रिकी मुलुक मोरिससबीचको मैत्रीपूर्ण खेलमा फुटबलको सर्वोच्च निकाय फिफाको नियमविपरीत ‘ड्रोन’ उडाइएको पाइएको छ ।
शनिबार साँझ अफ्रिकी देश मोरिससविरुद्ध पहिलो मैत्रीपूर्ण खेलमा नेपालले १-० गोलको जित निकालेको थियो ।
त्रिपुरेश्वरस्थित दशरथ रङ्गशालामा नेपाललाई जिताउन विमल घर्तीमगरले निर्णायक गोल गरेका थिए ।
पहिलो हाफ गोलरहित बराबरीमा सकिएको उक्त खेलको ५५औँ मिनेटमा उनले गोल गर्दै नेपाललाई जिताएका हुन् ।
सो खेलको प्रत्यक्ष प्रशारणका क्रममा फिफाको नियमविपरित ड्रोन उडाइएको थियो छ ।
उक्त खेलको प्रत्यक्ष प्रशारणका क्रममा ब्रोडकास्टरले म्याच कमिसनरको अनुमतिविपरीत ड्रोन उडाएको खुलेको हो ।
फिफा डिसिप्लिनरी कोडको १६औँ आर्टिकलअनुसार खेल भइरहेको समयमा ड्रोन उडाउन प्रतिबन्धित छ ।
हालैमात्र विश्व फुटबलमा पनि फुटबल खेलका दौरान ड्रोन उडाएको विषयलाई लिएर कारबाही भएको छ ।
२०२१ नोभेम्बर ११ मा भएको इक्वेडर र भेनेजुएलाबीचको खेलमा ड्रोन उडाएपछि आयोजक इक्वेडर फुटबल सङ्घ कारबाहीमा परेको थियो ।
यद्यपि, नेपाल र मोरिससबीचको खेलमा भने ब्रोडकास्टरले म्याच कमिसनर तथा एन्फाका उपाध्यक्ष उपेन्द्रमान सिंहले रोक्दा पनि अटेर गरेर उडाएको पाइएको छ ।
यसबारे म्याच कमिसनर सिंहले आफूले सुरुमा नपाइने भएकाले रोकेको तर पछि अटेर गरेर फेरि उडाएको बताए ।
