रियल मड्रिडले स्पेनिस सुपर कपको उपाधि जितेको छ । आइतबार राति रियादस्थित किङ फहाद अन्तर्राष्ट्रिय रङ्गशालामा ३० हजार समर्थकको अघि भएको फाइनल खेलमा एथ्लेटिक बिल्बाओलाई २-० गोलले हराउँदै रियलले उपाधि जितेको हो ।
१० खेलाडीमा सीमित रियलको जितमा लुका मोड्रिक र करिम बेन्जेमाले एक-एक गोल गरे । लुका मोड्रिकले खेलको ३८औँ मिनेटमा रियललाई अग्रता दिलाए ।
५२औँ मिनेटमा पाएको पेनाल्टी सदुपयोग गर्दै बेन्जेमाले २-० ले टोलीलाई अग्रता बनाए । बिल्बाओका खेलाडीले ह्यान्डबल गरेपछि रियलले पेनाल्टी पाएको थियो, जसलाई बेन्जेमाले सजिलै गोलमा परिणत गरे ।
खेलको ८७औँ मिनेटमा रियलका एडर मिलिटाओले हातले बल रोकेपछि रातो कार्ड पाए । यसबाट पेनाल्टीको माैका पाएको बिल्बाओले गोलमा परिणत गर्न सकेन । राउल गार्सियाको प्रहारलाई थियाबट कोर्टवाले उत्कृष्ट बचाऊ गरे ।
सिजनको पहिलो उपाधि जित्ने लक्ष्यका साथ मैदान उत्रिएका दुवै टोली ६४ वर्षपछि फाइनलमा भिडेका थिए । सन् १९५८ को कोपा डेल रेमा यी दुईबीच पछिल्लो पटक फाइनलमा भेट भएको थियो ।
यससँगै रियलले १२औँ पटक सुपर कपको उपाधि हात पारेको छ । रियल बार्सिलोनाको १३ वटा सुपरकपको कीर्तिमानको नजिक पुगेको छ ।
रियल पहिलो सेमिफाइनल खेलमा बार्सिलोनालाई ३–२ गोलले हराउँदै फाइनलमा पुगेको थियो भने बिल्बाओ दोस्रो सेमिफाइनल खेलमा एथ्लेटिको मड्रिडलाई २–१ गोलले हराउँदै उपाधि नजिक पुगेको थियो ।
