नेपाल टेलिकमले फोरजी एलटीई नमस्ते वाइफाई प्याकेज ल्याएको छ ।
फाइबर इन्टरनेट पहुँच नरहेका स्थानलाई लक्षित गर्दै टेलिकमले नमस्ते वाइफाई प्याकेज ल्याएको हो ।
उच्च गतिको डेटा र भ्वाइस सेवालाई व्यापक बनाउन टेलिकमले यो सेवा सुरु गरेको हो । यो सेवा उपयोगका लागि छुट्टै डिभाइस भने प्रयोग गर्नुपर्ने हुन्छ ।
त्यस्तो डिभाइस उपलब्ध गराउन कम्पनीले बुधबार साइबरनेटिक्स प्रालिसँग सम्झौता पनि गरेको छ ।
टेलिकमले अहिले व्यक्तिगत र सरकारी संस्था गरी दुई प्रकारका नमस्ते वाइफाई प्याकेज उपलब्ध गराएको छ । व्यक्तिगत प्याकेजअन्तर्गत न्युनतम आठ सय रुपैयाँमा मासिक ६० जिबी डेटा प्रयोग गर्न सकिने छ ।
यही प्याकेज एक वर्षका लागि भने नौ हजार रुपैयाँमा किन्न सकिनेछ । यसमा ग्राहकले सात सय २० जिबी डेटा प्राप्त गर्ने र त्यसलाई प्रत्येक महिना ६० जिबीको दरले प्रयोग गर्नुपर्ने छ ।
यी दुवैमा एड अन प्याकका रूपमा चार सय रुपैयाँमा १५ दिनका लागि ६० जिबी प्याक लिन सकिने सुविधा पनि कम्पनीले उपलब्ध गराएको छ ।
यही प्याकेज कम्पनीले प्रिमियमअन्तर्गत पनि उपलब्ध गराएको छ जुन मासिक एक हजार दुई सय रुपैयाँ पर्छ ।
सरकारी संस्थाका लागि कम्पनीले तीन हजार ६ सय ५० र दुई हजार एक सय रुपैयाँमा एक महिनाका लागि प्याकेज उपलब्ध रहेको कम्पनीले जनाएको छ ।
