नेपाली कांग्रेसकी महामन्त्री डिला संग्रौला पन्तले वर्तमान सरकारले दुई तिहाइको शक्तिको आडमा आलोचना गर्ने र प्रश्न उठाउनेहरूलाई दबाउन खोजेको आरोप लगाएकी छन्। लोकतन्त्र र नागरिक स्वतन्त्रतामाथि हस्तक्षेप भए कांग्रेस सडक आन्दोलनमा उत्रिने उनको चेतावनी छ।
नेपाल विद्यार्थी संघ गोरखा–काठमाडौं सम्पर्क समितिले शनिबार काठमाडौंमा आयोजना गरेको शुभकामना आदानप्रदान तथा चियापान कार्यक्रममा बोल्दै पन्तले मुलुक कठिन परिस्थितिबाट गुज्रिरहेको बताइन्।
उनले देशका प्रमुख समस्या समाधानमा ध्यान दिनुको सट्टा लोकतन्त्रका लागि संघर्ष गरेका नेता तथा राजनीतिक दलविरुद्ध राज्यशक्ति प्रयोग भइरहेको दाबी गरिन्। प्रश्न गर्ने नागरिकलाई लखेट्ने र खेद्ने प्रवृत्ति लोकतन्त्रका लागि दुर्भाग्यपूर्ण भएको उनको भनाइ थियो।
पन्तले शिक्षा क्षेत्रको गुणस्तर खस्किँदै गएको र रोजगारीको अवसर नहुँदा युवाहरू विदेशिने क्रम बढेको पनि बताइन्। युवालाई स्वदेशमै भविष्य देखाउन सरकारले प्रभावकारी काम गर्न नसकेको उनको आरोप थियो। कांग्रेसले युवालाई विदेश होइन, स्वदेश फर्काउने अभियान सञ्चालन गर्ने उनले बताइन्।
कार्यक्रममा राष्ट्रिय सभा सदस्य एवं कांग्रेस नेता किरणबाबु श्रेष्ठले कांग्रेसको १५औँ महाधिवेशनले पार्टीमा नयाँ उत्साह थपेको बताए। कांग्रेस र पार्टी नेतृत्वविरुद्ध प्रायोजित गतिविधि भइरहेको दाबी गर्दै उनले लोकतन्त्रको रक्षाका लागि नेता तथा कार्यकर्ता एकजुट हुनुपर्नेमा जोड दिए।
श्रेष्ठले बूढीगण्डकी क्षेत्रमा बाढीबाट घरबारविहीन भएका नागरिकले अझै छानो र पालसमेत नपाएको भन्दै सरकारको ध्यानाकर्षण गराए। प्रभावितलाई तत्काल राहत उपलब्ध गराउन उनले माग गरे।
नेपाल विद्यार्थी संघकी केन्द्रीय अध्यक्ष करुणा कटुवालले राज्यशक्तिको आडमा कसैलाई अनावश्यक रूपमा तर्साउने काम नगर्न सरकारलाई चेतावनी दिइन्। लोकतन्त्रमाथि खतरा उत्पन्न गर्ने गतिविधि भए नेविसंघ चुप लागेर नबस्ने उनको भनाइ थियो।
त्यस्तै, कांग्रेस केन्द्रीय सदस्य जानुका पन्तले लोकतन्त्र र स्वतन्त्रतामाथि चुनौती सिर्जना भए भ्रातृ संगठनसहित कांग्रेस सडकमा उत्रिने बताइन्। अर्का केन्द्रीय सदस्य इन्जिनियर दीपकबाबु कँडेलले महँगी र बेरोजगारी बढिरहँदा सरकारले नागरिकका समस्यालाई प्राथमिकता दिन नसकेको आरोप लगाए।
समितिका अध्यक्ष कमल पन्तको अध्यक्षतामा सोह्रखुट्टेस्थित लेखनाथ साहित्य सदनमा सम्पन्न कार्यक्रममा कांग्रेसका नेता तथा कार्यकर्ताको उपस्थिति थियो। कार्यक्रममा दीपावली, नेपाल संवत् ११४७ र छठ पर्वको शुभकामना आदानप्रदानसँगै सम्मान तथा चियापान गरिएको थियो।
