रुसका राष्ट्रपति भ्लादिमिर पुटिनले इरानसँगको युद्ध अन्त्य गर्न तेहरानले अघि सारेका सर्तबारे अमेरिकी राष्ट्रपति डोनाल्ड ट्रम्पलाई जानकारी गराएका छन्। क्रेमलिनले पुटिनले इरानको धारणा ट्रम्पसमक्ष प्रस्तुत गरेको जनाएको हो।
रुसी सञ्चारमाध्यमका अनुसार क्रेमलिनका प्रवक्ता दिमित्री पेस्कोभले इरानी राष्ट्रपतिसँग समन्वय गरेर पुटिनले द्वन्द्व समाधानका सम्भावित उपायबारे अमेरिकी पक्षलाई जानकारी गराएको बताएका छन्।
यसैबीच, ट्रम्पले आगामी केही महिनामा रुसबाट १० लाख टनभन्दा बढी डिजेल आयात गर्न दिने सहमति पुटिनसँग भएको दाबी गरेका छन्। रुसमाथि अमेरिकी प्रतिबन्ध कायम रहेकै अवस्थामा यस्तो सहमति भएको उनको भनाइ छ।
अमेरिका र इजरायलले इरानमाथि गरेको आक्रमणपछि क्षेत्रीय तनाव बढ्नुका साथै अन्तर्राष्ट्रिय बजारमा इन्धनको मूल्यसमेत तीव्र रूपमा बढेको छ। यस्तो अवस्थामा पुटिनले इरानको प्रस्ताव ट्रम्पसमक्ष पुर्याउनुलाई युद्ध समाधानका लागि कूटनीतिक पहलका रूपमा हेरिएको छ।
यद्यपि, इरानले अघि सारेका सर्त के–के हुन् र त्यसप्रति अमेरिकी पक्षको प्रतिक्रिया कस्तो छ भन्नेबारे विस्तृत विवरण सार्वजनिक भएको छैन। युद्ध अन्त्यका लागि तीनै पक्षबीच सहमति बन्ने वा नबन्ने विषय अझै अनिश्चित छ।
