काठमाडौं । कक्रोच जनता पार्टी (सीजेपी) का संस्थापक अभिजीत दिपके पक्राउ परेका छन्। उनलाई मुम्बईबाट फ्लाइटमार्फत दिल्ली पुगेपछि दिल्ली विमानस्थलबाट प्रहरीले पक्राउ गरेको हो।
दिपकेसँगै आशुतोष रान्का र सौरभ दास पनि पक्राउ परेका छन्। उनीहरू मुख्य निर्वाचन आयुक्त ज्ञानेश कुमारको राजीनामा र एसआईआर प्रक्रिया निलम्बनको माग गर्दै जन्तरमन्तरमा आयोजित सीजेपीको विरोध प्रदर्शनमा सहभागी हुन दिल्ली पुगेका थिए।
यसअघि दिपकेले प्रधानमन्त्री नरेन्द्र मोदीमाथि आरोप लगाउँदै विरोध प्रदर्शनअघि नै सरकारले हार स्वीकार गरिसकेको दाबी गरेका थिए। उनले प्रदर्शनकारीमाथि कारबाही र प्रतिबन्ध लगाउनु शक्तिको नभई आफ्नै जनतासँग डराएको संकेत भएको बताएका थिए।
यसअघि प्रहरीले युट्युबर ध्रुव राठीलाई पनि गुरुग्रामस्थित उनको घरबाट पक्राउ गरेको थियो। राजधानी दिल्लीका विभिन्न स्थानबाट करिब ६०० अन्य समर्थकलाई समेत पक्राउ गरिएको बताइएको छ।
प्रदर्शनलाई ध्यानमा राख्दै दिल्लीमा सुरक्षा व्यवस्था कडा पारिएको छ। दर्जनौँ मेट्रो स्टेसन बन्द गर्ने आदेश दिइएको छ भने केही रेल सेवासमेत रद्द गरिएको छ। भारतको सर्वोच्च अदालतले भने सबै मेट्रो स्टेसन एकैपटक बन्द नगर्न र केही रेल सेवा सञ्चालनमा राख्न निर्देशन दिएको छ।
सीजेपीले देशभर कम्तीमा १० हजार समर्थकलाई नियन्त्रणमा लिइएको आरोप लगाएको छ। प्रहरीले भने यसबारे विस्तृत प्रतिक्रिया दिएको छैन।
सीजेपीले मतदाता नामावली पुनरावलोकन अर्थात् एसआईआर प्रक्रियालाई लिएर विरोध गर्दै आएको छ। सन् २०२५ मा सुरु भएको पुनरावलोकनका क्रममा प्रारम्भिक मतदाता सूचीबाट १३ करोड ३० लाखभन्दा बढी नाम हटाइएको दाबी गरिएको छ।
यस विषयलाई लिएर भारतमा निर्वाचन प्रक्रिया, मतदाता अधिकार र मतदाता नामावलीको पारदर्शिताबारे बहस चर्किएको छ।
