काठमाडौं । नेपाल टेलिकमले दसैं, तिहार तथा छठ पर्वलाई लक्षित गर्दै ‘दसैं तिहार अफर २०८३’ सार्वजनिक गरेको छ। अफरमा एफटीटीएच इन्टरनेट, मोबाइल डाटा, भ्वाइस र एसएमएस प्याकेजमा छुट तथा सहुलियत दिइएको छ।
टेलिकमका अनुसार असोज २५ देखि कात्तिक ३० गतेसम्म नयाँ एफटीटीएच जडान गर्ने ग्राहकले ५०० रुपैयाँ जडान शुल्क छुट पाउनेछन्। १००, १५० र २०० एमबीपीएसका नयाँ वार्षिक प्याकेज खरिद गर्दा एक महिना थप गरी १३ महिनाको सेवा उपलब्ध हुनेछ।
४९९ रुपैयाँमा दैनिक ५ जीबी डाटा
अफरअन्तर्गत जीएसएम मोबाइल प्रयोगकर्ताले ४९९ रुपैयाँमा ‘फेस्टिभल अनलिमिटेड’ र ६९९ रुपैयाँमा ‘फेस्टिभल अनलिमिटेड प्रिमियम’ प्याकेज खरिद गर्न सक्नेछन्।
४९९ रुपैयाँको प्याकेजमा दैनिक ५ जीबी र ६९९ रुपैयाँको प्याकेजमा दैनिक १० जीबी डाटा उपलब्ध हुनेछ। दैनिक तोकिएको डाटा सकिएपछि क्रमशः २ एमबीपीएस र ३ एमबीपीएस गतिमा बाँकी अवधिभर असीमित डाटा चलाउन सकिनेछ। दुवै प्याकेजको अवधि ३० दिनको हुनेछ।
भ्वाइस र एसएमएसमा पनि अफर
टेलिकमले २५० रुपैयाँमा सबै नेटवर्कमा प्रयोग गर्न मिल्ने १ हजार मिनेट भ्वाइससहितको ‘जोयफुल मिनेट्स’ प्याकेज ल्याएको छ। त्यस्तै, ९९ रुपैयाँमा १ हजार अन-नेट एसएमएससहितको ‘फेस्टिभ म्यासेज’ प्याकेज उपलब्ध हुनेछ। यी दुवै प्याकेजको अवधि ३० दिनको हुनेछ।
मोबाइलबाट प्याकेज खरिद गर्ने ग्राहकले असोज ३० देखि कात्तिक ३० गतेसम्म अफरको सुविधा लिन सक्नेछन्। ग्राहकले *1415*11# डायल गरेर वा नेपाल टेलिकम एपमार्फत प्याकेज खरिद गर्न सक्नेछन्।
