बाढीपहिरोले क्षति पुर्याएको लमजुङको बेँसीसहरदेखि मनाङको चामेसम्मको सडक मर्मत तथा पुनर्निर्माणका लागि एक अर्ब रुपैयाँ आवश्यक पर्ने भएको छ। त्यस्तै, सडकको समग्र स्तरोन्नतिका लागि तीन अर्ब रुपैयाँ खर्च हुने अनुमान गरिएको छ।
डुम्रे–बेँसीसहर–चामे सडक आयोजनाले क्षतिग्रस्त संरचनाको पुनर्निर्माण र सडक स्तरोन्नतिका लागि छुट्टाछुट्टै बजेट प्रस्ताव सम्बन्धित मन्त्रालयमा पठाएको जनाएको छ।
आयोजना प्रमुख सतीश सुवेदीका अनुसार असोज ८ देखि ११ गतेसम्म परेको अविरल वर्षापछि आएको बाढीपहिरोले ६५ किलोमिटर लामो बेँसीसहर–चामे सडकका ३५ भन्दा बढी स्थानमा क्षति पुर्याएको थियो। तीमध्ये छ स्थानमा सडकको ट्र्याक नै क्षतिग्रस्त भएको थियो भने विभिन्न स्थानका काठे पुलसमेत बगाएको थियो।
रामबजार, नासोँ गाउँपालिका–३ को खोत्रो र मनाङको कोतो क्षेत्रमा बढी क्षति पुगेको आयोजनाले जनाएको छ। बाढीपहिरोका कारण सडक छ दिनसम्म अवरुद्ध भएको थियो। सडक पुनः सञ्चालनमा ल्याउन विभिन्न स्थानमा नयाँ ट्र्याक खोल्नुका साथै ठूला ढुङ्गा हटाउनसमेतुपरेको थियो।
आयोजना प्रमुख सुवेदीका अनुसार हाल सडक सञ्चालनमा आए पनि क्षतिग्रस्त संरचनाको मर्मत तथा स्तरोन्नति आवश्यक छ। बगाएका काठे पुलको स्थानमा पक्की पुल निर्माण गर्ने र जोखिमयुक्त सडक खण्ड सुधार गर्ने कामका लागि एक अर्ब रुपैयाँको प्रस्ताव गरिएको हो।
यसैगरी, तीन वर्षअघि तयार गरिएको विस्तृत परियोजना प्रतिवेदन (डीपीआर) अनुसार बेँसीसहर–चामे सडकको समग्र स्तरोन्नतिका लागि तीन अर्ब रुपैयाँ आवश्यक पर्ने अनुमान छ। उक्त योजनामा सडक कालोपत्र गर्ने, आवश्यक स्थानमा ढलान गर्ने र पक्की पुल निर्माण गर्ने लक्ष्य राखिएको छ।
आयोजनाका अनुसार बजेट उपलब्ध भए तत्काल क्षति पुगेका स्थानको पुनर्निर्माणसँगै सडकको दीर्घकालीन सुधार गर्न सकिनेछ। हाल भने उपलब्ध स्रोतसाधनबाट सामान्य मर्मत तथा स्तरोन्नतिको काम भइरहेको छ।
बेँसीसहर–चामे सडक लमजुङ र मनाङलाई जोड्ने प्रमुख मार्ग हो। यस सडकको सुधारले स्थानीय बासिन्दाको आवागमन, पर्यटकको यात्रा र दैनिक उपभोग्य सामग्रीको ढुवानी सहज बनाउने अपेक्षा गरिएको छ। तर, पुनर्निर्माण तथा स्तरोन्नतिको काम अघि बढाउन आवश्यक बजेट उपलब्ध हुनुपर्ने देखिएको छ।
