काठमाडौं । कक्रोच जनता पार्टी (सीजेपी) ले शनिबार मुख्य निर्वाचन आयुक्त ज्ञानेश कुमारको राजीनामाको माग गर्दै प्रदर्शन गर्ने भएको छ। पार्टीले प्रदर्शनमा सहभागी हुन सबै विपक्षी दललाई आह्वान गरेको छ।
प्रदर्शनमा लेफ्ट, आम आदमी पार्टी र ममता बनर्जी नेतृत्वको तृणमूल कांग्रेस सहभागी हुने भएका छन्। तर, भारतीय राष्ट्रिय कांग्रेस भने प्रदर्शनमा सहभागी नहुने भएको छ।
भारतीय राष्ट्रिय कांग्रेसका नेता राहुल गान्धी शनिबार विद्यार्थीसम्बन्धी अर्को कार्यक्रममा सहभागी हुन चेन्नईमा रहने भएकाले प्रदर्शनमा सहभागी नहुने बताइएको छ।
यसअघि समाजवादी पार्टीका नेता अखिलेश यादवले सीजेपीको प्रदर्शनप्रति नैतिक समर्थन रहेको बताएका थिए। उनले शनिबार बिहान सामाजिक सञ्जालमार्फत पनि प्रदर्शनकारीको पक्षमा आफ्नो धारणा सार्वजनिक गरेका छन्।
अखिलेशले सरकारले बल प्रयोग गरेर जनतालाई रोक्न खोजे त्यो ठूलो भूल हुने बताएका छन्। उनले जन्तरमन्तर अब एउटा स्थानको नाम मात्र नभई नयाँ चेतना र जागरणको प्रतीक बनेको दाबी गरेका छन्।
उनले सरकारले आन्दोलनकारीलाई रोक्ने प्रयास गरे देशका विभिन्न ठाउँमा जन्तरमन्तरजस्तै विरोध प्रदर्शन हुने चेतावनीसमेत दिएका छन्।
