विराटनगर- मोरङको विराटनगर महानगरपालिका-१ अनुकरण मार्गमा लागुऔषध प्रयोगकर्ताको चक्कु प्रहारबाट दुई जना प्रहरीसहित तीन जना घाइते भएका छन्।
रामेछाप घर भइ अनुकरण मार्गस्थित मोहन भट्टराईको घरमा कोठा भाडामा बस्दै आएका २९ वर्षीय रुबिन कार्कीले प्रहरीसहितलाई चक्कु प्रहार गरेका हुन्।
जिल्ला प्रहरी कार्यालय मोरङका अनुसार आफन्तले उनलाई नेपाल सुधारगृह काठमाडौं पठाउन लागेका थिए। सोहीबीच उनले कोठामै देहत्याग गर्न लागेको खबर प्रहरीले प्राप्त गरेको थियो।
आइतबार अपराह्न ५:३० बजे सीआरभी भट्टाचोकबाट खटिएको प्रहरी टोलीले उनलाई आफन्तको सहयोगमा सम्झाइबुझाइ गर्दै गर्दा उनले एक्कासि प्रहरी र सुधारगृहका कर्मचारीलाई चक्कु प्रहार गरेका हुन्।
कार्कीको चक्कु प्रहारबाट सीआरभी भट्टाचोकमा कार्यरत प्रहरी प्रहरी सहायक निरीक्षक भोजराज रेग्मी, प्रहरी जवान हिमाल घिमिरे र नेपाल सुधारगृहका कर्मचारी सन्तोष सापकोटा सामान्य घाइते भएका छन्।
उनीहरू सबैको टाउकोमा सामान्य चोट लागेको जिल्ला प्रहरी कार्यालय मोरङका सूचना अधिकारी डीएसपी मकेन्द्रकुमार मिश्रले जानकारी दिए।
चक्कु प्रहार गर्ने कार्कीलाई जिल्ला प्रहरी कार्यालय मोरङबाट खटिएको टोलीले तत्काल नियन्त्रणमा लिइ आफ्नो हिरासतमा राखेर थप अनुसन्धान गरिरहेको छ।
