विराटनगर । प्रथम संस्करणको ‘इसोनर्म फास्ट ४० फुटसल कप २०२६’ को उपाधि आयोजक गोर्खा लेजेन्ड वारियर फुटसल क्लबले जितेको छ ।
शनिबार विराटनगरस्थित जेएनएल फुटसलमा भएको फाइनलमा एलएलएफसी फुटसल टिमलाई ३–० गोल अन्तरले पराजित गर्दै आयोजक टोली च्याम्पियन बनेको हो ।
उपाधिसँगै गोर्खा लेजेन्ड वारियरले नगद ५५ हजार ५ सय ५५ रुपैयाँसहित ट्रफी, मेडल र प्रमाणपत्र प्राप्त गरेको छ । उपविजेता एलएलएफसीले नगद २२ हजार २ सय २२ रुपैयाँसहित ट्रफी, मेडल र प्रमाणपत्रमा चित्त बुझाएको छ ।
आयोजक टोलीले सेमिफाइनलमा विराट मेडिकल कलेज चिकित्सक टोलीलाई पराजित गर्दै फाइनलमा स्थान बनाएको थियो । यस्तै, एलएलएफसीले बिपी कोइराला स्वास्थ्य विज्ञान प्रतिष्ठान अस्पतालका कन्सल्टेन्ट टोलीलाई पराजित गर्दै फाइनल यात्रा तय गरेको थियो ।
प्रतियोगिताका विधागत पुरस्कारमा पनि आयोजक टोलीकै खेलाडीको वर्चस्व रह्यो । फाइनल खेलमा गोर्खा लेजेन्ड वारियरका सनम राई ‘म्यान अफ द म्याच’ घोषित भए ।
यस्तै, आयोजक टोलीकै सन्दिप कँडेल सर्वाधिक गोलकर्ता, क्षितिज शाक्य उत्कृष्ट गोलरक्षक, राज अधिकारी उत्कृष्ट प्रशिक्षक र अन्कित बस्नेत उत्कृष्ट खेलाडी घोषित भए ।
विजेता तथा उपविजेता टोलीलाई समापन समारोहका प्रमुख अतिथि एवं आयोजक क्लबका अध्यक्ष धिरेन सम्सेर कुँवर, विशिष्ट अतिथि सुजन बस्नेत तथा अतिथिहरू सुवाशिस कोइराला, सरोज भण्डारी, जीवन बस्नेत, सुमन गिरी, सौरभ कोइराला र सुष्मा खड्काले पुरस्कार वितरण गरेका थिए ।
चिकित्सक तथा स्वास्थ्य व्यवसायीबीच आपसी भाइचारा, सद्भाव र मनोरञ्जन अभिवृद्धि गर्ने उद्देश्यले प्रतियोगिता आयोजना गरिएको आयोजक क्लबका अध्यक्ष धिरेन शमशेर कुँवरले बताए ।
प्रतियोगितामा मोरङ र सुनसरीका स्वास्थ्य व्यवसायी तथा चिकित्सकका १५ टोलीको सहभागिता रहेको थियो । प्रतियोगिता नकआउट फर्म्याटमा सञ्चालन गरिएको थियो ।
