विराटनगर । देशभर चिसोको प्रभाव बिस्तारै बढ्न थालेसँगै न्यूनतम तापक्रम घट्ने क्रम जारी छ।
जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार देशमा पश्चिमी वायुको आंशिक प्रभाव रहेकाले अधिकांश भूभागमा चिसो बढ्दै गएको हो।
महाशाखाले सार्वजनिक गरेको १७ वटा मौसम मापन केन्द्रको विवरणअनुसार आइतबार देशकै सबैभन्दा कम न्यूनतम तापक्रम जुम्लामा मापन गरिएको छ। जुम्लाको न्यूनतम तापक्रम माइनस ०.५ डिग्री सेल्सियसमा झरेको महाशाखाले जनाएको छ।
जुम्लामा पछिल्ला दिनमा तापक्रम निरन्तर घटिरहेको तथ्यांकले देखाएको छ। शुक्रबार त्यहाँको न्यूनतम तापक्रम ३.० डिग्री सेल्सियस रहेकामा शनिबार घटेर १.५ डिग्री सेल्सियस पुगेको थियो।
आइतबार थप घटेर माइनस ०.५ डिग्री सेल्सियसमा झरेको हो।
