विराटनगर । नेपाली कांग्रेसको इतर समूहबाट विराटनगर महानगरपालिकाको सभापतिमा रिचर्ड गौतम सर्वसम्मत निर्वाचित भएका छन् ।
शुक्रबार विराटनगरस्थित कञ्चनजंघा पार्टी प्यालेसमा सम्पन्न इतर समूहको अधिवेशनले गौतमलाई महानगर कार्यसमितिको सभापतिमा सर्वसम्मत चयन गरेको हो ।
यसअघि संस्थापन पक्षबाट कृष्णबहादुर कार्की विराटनगर महानगर सभापतिमा निर्वाचित भइसकेका छन् । गौतमको नेतृत्वमा बनेको कार्यसमितिको उपसभापतिमा आकाश घिमिरे र कृष्णाकुमारी साह चयन भएका छन् ।
त्यस्तै, सचिवमा सुवास उप्रेती र मनिषा खनाल निर्वाचित भएका छन् । कार्यसमितिका अन्य पदाधिकारी तथा सदस्यहरू पनि सोही अधिवेशनबाट चयन गरिएको जनाइएको छ ।
इतर समूहको भेला तथा अधिवेशनलाई कोशी प्रदेशका मुख्यमन्त्री केदार कार्कीले सम्बोधन गरेका थिए । सम्बोधनका क्रममा उनले पार्टीभित्रको आन्तरिक लोकतन्त्र, विधि, पद्धति र निष्ठावान् कार्यकर्ताको मूल्याङ्कनमा जोड दिएका थिए ।
