विराटनगर । विराटनगरमा जारी हिसान स्पोर्ट्स मिटअन्तर्गत टेबलटेनिसको उपाधि अरनिको, बिकेभिएम र सगरमाथाले जितेका छन् ।
आइतबार भएको टेबलटेनिसको छात्रा टिम इभेन्टतर्फ अरनिको स्कुलले सगरमाथा स्कुललाई ३–२ को सेटमा पराजित गर्दै उपाधि जितेको हो ।
छात्रतर्फ बिकेभिएम स्कुलले मेरिल्याण्ड कलेजलाई ३–१ को सेटमा हराउँदै उपाधि जित्यो ।
त्यस्तै, टेबलटेनिसको छात्र एकलतर्फ बिकेभिएमका यथार्थ आचार्यले सगरमाथाका रजतरमण दवाडीलाई सोझो सेटमा हराउँदै उपाधि जिते ।
छात्रातर्फ सगरमाथाकी रुबी मेहताले अरनिकोकी ओमकुमारी चौधरीलाई सोझो सेटमा पराजित गर्दै उपाधि जितिन् ।
प्रतियोगिताको छात्र फुटबलको पहिलो खेलमा रेडस्टार स्कुलले जेभियर्स स्कुललाई २–० गोल अन्तरले पराजित गर्दै सेमिफाइनलमा पुगेको छ ।
रेटस्टारका लागि सदानन्द मगर र छोसाङ गुरुङले समान १–१ गोल गरे । खेलको प्लेयर अफ द म्याच रेडस्टारका जोसन कार्की भए ।
दोस्रो खेलमा कान्तिपुर कलेजले शिक्षासन्देश स्कुललाई २–० गोल अन्तरले पराजित गर्दै सेमिफाइनलमा पुगेको छ ।
कान्तिपुरका सोनु चौधरी र प्रशान्त लिम्बूले १–१ गोल गरे । खेलको प्लेयर अफ द म्याच कान्तिपुरका सरोज साह भए ।
छात्रा फुटबलमा साबिक विजेता अर्किड कलेजले शिक्षादीप कलेजलाई ४–० को गोल अन्तरले पराजित गरेको छ ।
अर्किडका लागि समीक्षा आचार्यले ३ र पूर्णिमा बास्तोलाले १ गोल गरिन् । खेलको प्लेयर अफ द म्याच अर्किडकी सुस्मिता बस्नेत भइन् ।
त्यसैगरी, क्रिकेट खेलको पहिलो खेलमा ग्रिनल्याण्ड कलेजले साबिकको विजेता कान्तिपुर कलेजलाई ९ विकेट पराजित गर्दै सेमिफाइनलमा पुगेको छ ।
टस जितेर ब्याटिङ गरेको कान्तिपुरले निर्धारित १५ ओभरमा ७ विकेट गुमाउँदै ८१ रन बनायो । हेमराज हमालले २० रन बनाए ।
ग्रिनल्याण्डका फैजल अन्सारी, गौरीशङ्कर माझी र सन्जीव शर्माले २–२ विकेट लिए ।
८२ रनको लक्ष्य पाएको ग्रिनल्याण्डले १३ ओभर २ बलमा १ विकेटको क्षतिमा विजयी भयो ।
सुनिल यादवले २७ रन र प्लेयर अफ म्याच हेमन्त शर्मा २६ रन बनाए । कान्तिपुरका रामरतन यादवले १ विकेट लिए ।
दोस्रो खेलमा मेरिल्याण्ड कलेजले सेन्टजोसेफ कलेजलाई ९० रनले हराउँदै अन्तिममा चारमा पुगेको छ ।
टस जितेर ब्याटिङ गरेको मेरिल्याण्डले निर्धारित १८ ओभरमा ४ विकेटको क्षतिमा १ सय ४५ रन बनायो । कुष्ण देवले ५५ रन बनाए । सेन्टजोसेफका सुदीप ठाकुरले २ विकेट लिए ।
जवाफमा १ सय ४६ रनको चुनौती पाएको सेन्टजोसेफले १३ ओभरमा सबै विकेट गुमाउँदै ५५ रनमै समेटियो । मेरिल्याण्डका प्लेयर अफ म्याच मौसम यादवले ५ विकेट लिए ।
यस्तै, बास्केटबलको पहिलो खेलमा शिक्षादीप कलेजले सगरमाथा स्कुललाई २१–७ को अन्तरले पराजित गर्यो । दोस्रो खेलमा बिकेभिएम स्कुलले अरनिको स्कुललाई ४६–२१ को अन्तर पराजित गर्यो ।
यसैगरी, भलिबलको छात्रतर्फको पहिलो खेलमा कान्तिपुर कलेजले सगरमाथा कलेजलाई सोझो सेटले पराजित गर्दै सेमिफाइनलमा प्रवेश गरेको छ ।
दोस्रो खेलमा मोडर्न एरा स्कुलले अर्किड कलेजलाई सोझो सेटले पराजित गर्दै सेमिफाइनलमा प्रवेश गरेको छ ।
तेस्रो खेलमा शिक्षासन्देश स्कुलले ग्रिनल्याण्ड कलेजलाई २–१ को सेटले हराउँदै सेमिफाइनलमा पुगेको छ ।
चौथो खेलमा रेडस्टार स्कुलले बिकेभिएम स्कुललाई सोझो सेटमा हराउँदै सेमिफाइनलमा पुग्यो ।
छात्रातर्फ मोडर्न एराले कान्तिपुर कलेजलाई सोझो सेटमा पराजित गर्दै सेमिफाइनलमा पुगेको छ ।
