विराटनगर । मोरङको जहदा गाउँपालिकाका-१ धुनी बस्तीबाट १५५ किलो गाँजासहित दुई जना पक्राउ परेका छन् ।
पक्राउ पर्नेमा धरान उपमहानगरपालिका-१२ का २४ वर्षीय राहुल विश्वकर्मा र धनकुटाको सहिदभूमि गाउँपालिका-६ का १९ वर्षीय सुरज राई रहेका छन् ।
मंगलबार राति करिब साढे १० बजे प्रहरीकाे चेकिङ छलेर भागेको स्कारपियोमा १५५ किलो गाँजा फेला परेको थियो ।
विराटनगर महानगरपालिका-१८ स्थित भट्टाचोकमा चेकजाँचका क्रममा प्रहरीलाई छलेर को १ च ९५८२ नम्बरको स्कारपियो भागेको थियो ।
उक्त स्कारपियो खोज्नका लागि प्रहरी नायब उपरीक्षक वेदप्रकाश जोशीको नेतृत्वमा खटिएको टोलीले धुनी बस्तीमा गाडी फेला पारेको थियो ।
धनकुटाबाट आएकाे साे गाँजा भारततर्फ लगिँदै थियाे । प्रहरीले घटनाको विषयमा थप अनुसन्धान गरिरहेको जनाएको छ ।
