विराटनगर । कोशी प्रदेशको राजधानी विराटनगरमा आगामी असोज २२ र २३ गते सातै प्रदेशका मुख्यमन्त्रीहरूको सम्मेलन हुने भएको छ।
कोशी प्रदेश सरकारको आयोजनामा हुन लागेको सम्मेलनका लागि प्रदेश सरकारले आवश्यक तयारी सुरु गरेको जनाएको छ।
सम्मेलनमा प्रदेशमा देखिएका समस्या, संघीयताका चुनौती तथा संघीयतालाई थप बलियो बनाउन अपनाउनुपर्ने उपायबारे छलफल हुने बताइएको छ।
कोशी प्रदेशका मुख्यमन्त्री हिक्मतकुमार कार्कीले संघीयतामा देखिएका चुनौती र प्रदेशहरूले अवलम्बन गरेका असल अभ्यासबारे छलफल गर्दै आर्थिक समृद्धि र सुशासनको बाटो पहिल्याउन सम्मेलन आयोजना गर्न लागिएको बताए।
सम्मेलनको आवश्यक तयारी तथा समन्वयको जिम्मेवारी कोशी प्रदेश योजना आयोगलाई दिइएको प्रदेश सरकारले जनाएको छ।
