धनगढी । लगातारको वर्षाका कारण सम्भावित जोखिमलाई मध्यनजर गर्दै सुदूरपश्चिम प्रदेशका सात पहाडी जिल्लामा सवारीसाधन सञ्चालनमा रोक लगाइएको छ।
कैलाली र कञ्चनपुरबाहेक प्रदेशका सबै पहाडी जिल्लामा सम्बन्धित जिल्ला प्रशासन कार्यालयले सूचना जारी गर्दै शनिबार बिहान ७ बजेदेखि आइतबार बिहान ७ बजेसम्म सवारीसाधन आवागमनमा रोक लगाएका हुन्।
प्रदेश ट्राफिक प्रहरी कार्यालय अत्तरियाका प्रमुख प्रहरी उपरीक्षक नवराज कार्कीका अनुसार लगातारको वर्षाका कारण हुनसक्ने सम्भावित बाढी, पहिरोलगायत जोखिमलाई ध्यानमा राख्दै स्थानीय प्रशासनले यस्तो निर्णय गरेको हो।
रोक लगाइएको अवधिमा पहाडी जिल्लामा छोटो तथा लामो दूरीका कुनै पनि सवारीसाधन सञ्चालन गर्न पाइने छैन। सडकको अवस्था तथा मौसममा सुधार आएपछि मात्रै थप निर्णय गरिने जनाइएको छ।
तराईका कैलाली र कञ्चनपुरमा भने तत्काल जोखिम कम रहेकाले सवारीसाधन सञ्चालन भइरहेको प्रदेश ट्राफिक प्रहरीले जनाएको छ।
प्रशासनले यात्रु तथा सवारी चालकलाई मौसम र सडकको अवस्था बुझेर मात्र यात्रा गर्न तथा सुरक्षा निकायको निर्देशन पालना गर्न आग्रह गरेको छ।
