काठमाडौं । बालबालिकालाई फकाएर अश्लील क्रियाकलापमा संलग्न गराउने एक युवतीलाई प्रहरीले पक्राउ गरेको छ ।
पक्राउ पर्नेमा सिन्धुपाल्चोक पाँचपोखरी गाउँपालिका-६ भई हाल काठमाडौँको गोकर्णेश्वर नगरपालिका-४ माकलबारी बस्ने १९ वर्षीय अञ्जली अधिकारी रहेको काठमाडौँ उपत्यका अपराध अनुसन्धान कार्यालयका प्रवक्ता प्रहरी उपरीक्षक रवीन्द्र रेग्मीले जनाए ।
बालबालिकालाई आर्थिक प्रलोभनमा पारी अनलाइन टाइपिङको रोजगारी उपलब्ध गराउने भनी अश्लील क्रियाकलापमा संलग्न गराएको आरोपमा अधिकारी पक्राउ परेकी हुन् ।
उनले विपन्न परिवारका बालबालिकालाई सामाजिक सञ्जाल स्ट्रिप च्याटमार्फत ‘फ्रि लाइभ सेक्स क्याम्स् एण्ड एडल्ट च्याट विथ नेक्ड् गल्स’ मा विभिन्न एकाउन्टहरू खोली सोही एकाउन्टमार्फत लाइभ भिडियो च्याटमा बसाउँथिन् ।
च्याटमा कस्टोमरहरूसँग अश्लील कुराकानी गर्न लगाउने गरेको खुलेको रेग्मीले बताए ।
उनका अनुसार बढी आम्दानी गर्नका लागि टोकन अर्न गर्नुपर्ने र सो को लागि आफ्नो शरीरको कपडा खोली यौनांगसमेत प्रदर्शन गर्नेलगायतका सामाग्री निर्माण गर्ने भन्ने सूचनाको आधारमा अधिकारीलाई पक्राउ गरिएको हो ।
पक्राउ परेकी उनीमाथि बालबालिका सम्बन्धी ऐन, २०७५ को परिच्छेद ८ को दफा ३ बमोजिमको कसुर मुद्दामा आवश्यक कारबाहीका लागि प्रहरी परिसर टेकु पठाइएको प्रहरीले जनाएको छ ।
प्रहरीका अनुसार उनीसँगै भिभो कम्पनीको मोबाइल एक थान, डेल कम्पनीको ल्यापटप एक थान, वेब क्यामरा एक थान र पारदर्शी कपडा चार थान बरामद गरिएको छ ।
