हेटौंडा । शौच गर्न शौचालय पसेका एक युवकको ग्यास गिजरका कारण निसास्सिएर मृत्यु भएको छ ।
मृत्यु हुनेमा मकवानपुरको हेटौंडा उपमहानगरपालिका-९ लामसुरेका २५ वर्षीय युनेश काफ्ले रहेका छन् ।
मकवानपुरका प्रहरी निरीक्षक प्रकाश शाहका अनुसार सोमबार दिउँसो बाथरुममा प्रयोग गरिएको ग्यास गिजरका कारण निसास्सिएर उनको मृत्यु भएको हो ।
शौचालयमा शौच गर्न गएका युनेश निकैबेरसम्म बाहिर ननिस्केपछि परिवारका सदस्यले बाहिरबाट बोलाएका थिए ।
तर, नबोलेपछि ढोका फोडेर हेर्दा उनी बेहोस अवस्थामा फेला परेका थिए ।
उनलाई तत्काल उपचारका लागि मकवानपुर सहकारी अस्पताल पुर्याइएकोमा चिकित्सकले मृत घोषणा गरेका हुन् ।
शौचालयमा रहेको ग्यास गिजर खुल्लै भएकाले अक्सिजनको कमी भएर काफ्लेको मृत्यु भएको हुनसक्ने चिकित्सकले बताएका छन् ।
