पपुवा न्युगिनी (पिएनजी) र मलेसिया सम्मेलित त्रिदेशीय टी–२० अन्तर्राष्ट्रिय सिरिजअन्तर्गत नेपाल फाइनलमा प्रवेश गरेको छ ।
कीर्तिपुरस्थित त्रिवि क्रिकेट मैदानमा बिहीबार भएको (पिएनजी)माथि ३७ रनको जित हात पार्दै नेपाल उपाधि नजिक पुगेको हो ।
लगातार तेस्रो जित निकालेको नेपाल एक खेलअगावै फाइनलमा पुगेको हो ।
अब, लिग चरणको अन्तिम खेलमा नेपालले शनिबार मलेसियासँग प्रतिस्पर्धा गर्ने छ ।
नेपालले पहिलो खेलमा पिएनजीलाई १५ रनले हराएको थियो ।
दोस्रो खेलमा मलेसियालाई ६ विकेटले पराजित गरेको थियो ।
त्रिवि मैदानमा नेपालले जितमा लागि दिएको दुई सय चार रनको लक्ष्य पछ्याएको पिएनजी १९ दशमलव चार ओभरमा सबै विकेटको क्षतिमा एक सय ६६ रनमा समेटिएको थियो ।
पिएनजीका लागि चार्ल्स अमिनीले सर्वाधिक ६२ रन बनाए ।
यस्तै, टोनी उराले ४३, सेसे बाउले २५, नोरमान भानुले १७ र रिले हेकुरेले ६ रन बनाए ।
बलिङमा नेपालका करण केसीले ह्याट्रिकसहित पाँच विकेट लिए ।
सोमपाल कामी र अविनास बोहराले दुई दुई तथा कप्तान सन्दीप लामिछानेले एक विकेट लिए ।
यसअघि टस हारेर पहिले ब्याटिङ गरेको नेपालले निर्धारित २० ओभरमा सात विकेटको क्षतिमा २०३ रन बनाएको थियो ।
नेपालका लागि दीपेन्द्रसिंह ऐरीले ६६ रनको अर्धशतकीय इनिङ्स खेलेपछि नेपालले जितका लागि बलियो गोगफल तयार पारेको थियो ।
ऐरीले सर्वाधिक ६६ रन बनाउने क्रममा ३३ बलमा तीन चौका र चार छक्का हाने ।
रोहित पौडेलले ४१ रन बनाए ।
रोहितले २३ बलमा चार चौका र दुई छक्काको सहयोगमा उक्त रन बनाए ।
ओपनर आशिफ शेखले ३८ र आदिल अन्सारीले ३१ रन बनाए ।
अलराउन्डर आदिलले यसै खेलबाट सिनियर टोलीमा डेब्यू गरेका हुन् ।
अर्का ओपनर कुशल भुर्तेल १७ रनमा आउट भए ।
बलिङमा पीएनजीका कवुवा मोरेयाले तीन, रिले हेकुरेले दुई तथा नोरमान भानु र नोसईना पोकनाले एक एक विकेट लिए ।
लगातार तीन खेल जितेपछि नेपाल ६ अङ्कसहित तालिकाको शीर्ष स्थानमा छ ।
लगातार तीन खेल हारेको पिएनजीले खाता खोल्न सकेको छैन ।
मलेसिया दुई अङ्कसहित तालिकाको दोस्रो स्थानमा छ ।
तीन टोली सहभागी यस सिरिजमा हरेक टोलीले एक आपसमा दुई-दुई खेल खेलेपछि शीर्ष दुई टोलीबीच फाइनल भिडन्त हुने छ ।
शुक्रबार पिएनजी र मलेसियाबीच प्रतिस्पर्धा हुने छ । फाइनल खेल सोमबार हुने छ ।
