विराटनगर । २०औँ एसियन गेम्समा कांस्यपदक जित्ने नेपाली खेलाडी, प्रशिक्षक तथा व्यवस्थापकले सरकारबाट पुरस्कार रकम पाएका छन्।
सरकारले खेलकुद विकास नियमावलीअनुसार उनीहरूको बैंक खातामा पुरस्कार रकम जम्मा गरेको हो।
करातेका तेञ्जिङ शर्माले ६ लाख ५० हजार, उनका प्रशिक्षक कुशल श्रेष्ठले १ लाख ३० हजार र व्यवस्थापक युवराज लामाले ६५ हजार रुपैयाँ पाएका छन्।
त्यस्तै, महिला कबड्डी टोलीका प्रत्येक खेलाडीले जनही १ लाख ९५ हजार, मुख्य प्रशिक्षक पार्वती राईले १ लाख ३० हजार तथा सहायक प्रशिक्षक लोकबहादुर विष्ट र व्यवस्थापक शरद दर्शनाधारीले जनही ६५ हजार रुपैयाँ पाएका छन्।
यसअघि असोज २३ गते बसेको मन्त्रिपरिषद् बैठकले पदक विजेता खेलाडी, प्रशिक्षक तथा व्यवस्थापकलाई पुरस्कार दिने निर्णय गरेको थियो।
जापानको नायोगामा आयोजित २०औँ एसियन गेम्समा नेपालका तेञ्जिङ शर्मा र महिला कबड्डी टोलीले कांस्यपदक जितेका थिए।
