युरोपियन च्याम्पियन राष्ट्र इटाली लगातार दोस्रो पटक फिफा विश्वकप फुटबलमा पुग्न असफल बनेको छ ।
विश्वकप छनोटअन्तर्गत बिहीबार राति प्ले अफ खेलमा नर्थ म्यासेडोनियासँग १-० ले पराजित भएपछि इटालीको विश्वकपमा यात्रा असफल भएको हो ।
इटालीले रसियामा भएको गत संस्करणको विश्वकप खेल्न पाएको थिएन ।
सन् २०१८ काे विश्वकपमा छनोट हुन असफल इटाली नर्थ मासेडोनियासँग प्ले अफमा पराजित भएसँगै कतारमा हुने आसन्न विश्वकप खेल्न असफल भएको हो ।
इटाली युरोपियन छनोटबाट सिधै विश्वकपमा पुग्न असफल भएको थियो । जसको कारण प्ले अफ खेलेको हो ।
गएराति इटालीमा भएको खेलमा नर्थ म्यासेडोनियालाई जित दिलाउन एलेकसान्डर ट्राज्कोभास्कीले निर्णायक गोल गरे ।
ट्राज्कोभास्कीले खेलको इन्जुरी समयमा गोल गरेका थिए ।
एलेकसान्डर ट्राज्कोभास्कीले ९२औं मिनेटमा बक्स बाहिरबाट सानदार गोल गरेपछि मासेडोनियाको बेन्चमा उल्लासको वातावरण बनेको थियो ।
इटालीका खेलाडी र अफिसियल भने घरेलु समर्थकका अगाडि घुँडा टेकेर निराश देखिएका थिए ।
यो हारको अर्थ इटाली लगातार दोस्रो पल्ट विश्वकपमा छनोट हुन असफल भएको हो ।
विश्व फुटबलको महामेलामा चार पल्टको विश्व विजेता इटलीले कम्तिमा १२ वर्ष प्रतीक्षा गर्नुपर्ने भएको छ ।
आठ महिनाअघि मात्र रोवर्टो मान्सिनी प्रशिक्षित इटलीले युरो-२०२० को फाइनलमा इङ्ग्ल्यान्डलाई उसकै मैदान वेम्बलीमा हराउँदै सानदार सफलता प्राप्त गरेको थियो ।
बिहीबार राति इटलीले अधिकांश समय खेल नियन्त्रणमा राखेको थियो ।
सुदृढ मासेडोनियाली रक्षापंक्तिको अगाडि इटलीको ३२ प्रहार र ५ सट अन टार्गेट असफल भयो ।
वरीयतामा ६७औं स्थानमा रहेको मासेडोनियाले युरोपेली प्लेअफको फाइनलमा पोर्चुगलसँग खेल्ने छ ।
युरोपियन छनोटको प्ले अफ खेलमा टर्कीलाई ३–१ गोलले हराउँदै पोर्चुगल विश्वकप नजिक पुगेको छ ।
पोर्टोमा भएको प्ले अफको सेमिफाइनल खेलमा पोर्चुगललाई जिताउन अतभियो एड्मिल्सन डा सिल्भा मोन्टेइरो, डिएगो जोटा र माथेअस नुनेसले एक–एक गोल गरे ।
टर्कीका बुराक इल्माजले एक गोल गरे ।
फिफा विश्वकप नोभेम्बर र डिसेम्बरमा कतारमा हुँदै छ ।
यसपटकको विश्वकप २१ नोभेम्बरदेखि १८ डिसेम्बरसम्म चल्ने छ ।
विश्वकपको इतिहासमै पहिलोपटक विश्वकपका खेलहरू समरमा नभई विन्टरमा हुन लागेको हो ।
