डिप्रेसन र एन्जाइटीका कारण मानव मस्तिष्कको एक भाग उल्लेखनीय रूपमा खुम्चिने अष्ट्रेलियाली अध्ययनले देखाएको छ ।
अस्ट्रेलियाली नेश्नल युनिवर्सिटी (एएनयू) द्वारा प्रकाशित अध्ययनले डिप्रेसन भएका मानिसको मस्तिष्कको भाग खुम्चिएको पत्ता लगाएको हो ।
१० हजार भन्दा बढी व्यक्तिको दिमागको अध्ययन गरिएको थियो । अध्ययनबाट डिप्रेसन मात्रले पनि स्मृति र सिकाईसँग जोडिएको दिमागको अंश हिप्पोक्याम्पसलाई खुम्च्याउने पाइएको छ ।
अध्ययनका प्रमुख लेखक डानिएला एस्पिनोजा ओयर्सका अनुसा डिप्रेसन भएका व्यक्तिहरूको मस्तिष्कको धेरै भाग (विशेष गरी हिप्पोक्याम्पस) कम भइरहेको बताएका छन् ।
हिप्पोक्याम्पसको आकार कम हुनु भनेको उमेर बढेसँगै अल्जाइमर रोगको लागि जोखिमको कारक रहेको उनको भनाइ छ ।
यसले डिमेन्सियाको विकासलाई पनि बढावा दिन सक्ने अध्ययनको निष्कर्ष रहेको छ । तर, डिप्रेसन र एन्जाइटी दुवै भएका मानिसमा मस्तिष्कको भागको आकार डिप्रेसन मात्र भएको मानिसभन्दा कम खुम्चिने हुन्छ ।
मस्तिष्कमा डिप्रेसनको प्रभावलाई हेर्ने धेरै अध्ययनहरूले डिप्रेसन भएका मानिसहरूलाई एन्जाइटी पनि हुने तथ्यलाई हेरेका हुदैनन् ।
एन्जाइटीले डिप्रेसनको प्रभावलाई कसरी कम गर्छ भन्ने बारे थप अनुसन्धान आवश्यक रहेकाे र त्यस विषयमा पनि अनुसन्धान केन्द्रीत गर्नुपर्ने अस्ट्रेलियाली अध्ययनले निष्कर्ष निकालेकाे छ ।
