स्वास्थ्य तथा खाद्य स्वच्छतामन्त्री निशा मेहताले मानसिक स्वास्थ्यसम्बन्धी समस्या भएका नागरिकलाई सहज रूपमा उपचार र सहयोग उपलब्ध गराउन सरकार प्रतिबद्ध रहेको बताएकी छन्।
विश्व मानसिक स्वास्थ्य दिवस २०२६ का अवसरमा स्वास्थ्य तथा खाद्य स्वच्छता मन्त्रालयले आयोजना गरेको कार्यक्रममा बोल्दै मन्त्री मेहताले मानसिक स्वास्थ्य सेवालाई गुणस्तरीय, पहुँचयोग्य र सेवाग्राहीमैत्री बनाउनु सरकारको प्राथमिकता रहेको बताइन्।
उनका अनुसार मानसिक स्वास्थ्यसम्बन्धी समस्या भएका व्यक्तिले उपचार खोज्दा अपमानित वा उपेक्षित महसुस गर्नुपर्ने अवस्थाको अन्त्य गर्न आवश्यक छ। प्रत्येक नागरिकले आफ्ना समस्या खुलेर व्यक्त गर्न सक्ने, समयमै सहयोग प्राप्त गर्ने र सम्मानपूर्वक जीवन बिताउन सक्ने वातावरण निर्माणमा सरकार केन्द्रित रहेको उनले स्पष्ट पारिन्।
मन्त्री मेहताले मानसिक स्वास्थ्य सेवालाई व्यवस्थित बनाउन कानुनी आधार तयार गर्ने काम अघि बढाइने जानकारी दिइन्। मानसिक स्वास्थ्यसम्बन्धी अवधारणापत्र मन्त्रिपरिषद्बाट पारित भइसकेको उल्लेख गर्दै उनले त्यसैका आधारमा आवश्यक ऐन निर्माणको प्रक्रिया अघि बढाउने बताइन्।
त्यस्तै, मानसिक स्वास्थ्यसम्बन्धी समस्या भएका व्यक्तिले उपचारका लागि विभिन्न ठाउँमा भौतारिनुपर्ने अवस्थाको अन्त्य गर्दै प्रारम्भिक उपचारदेखि विशेषज्ञ सेवासम्म सहज पहुँच सुनिश्चित गर्नुपर्नेमा उनले जोड दिइन्।
मन्त्री मेहताले १०० शय्याभन्दा बढी क्षमता भएका अस्पतालमा मानसिक स्वास्थ्य सेवाका लागि आवश्यक शय्या छुट्याउने र सेवा व्यवस्थापनलाई प्रभावकारी बनाउने विषयलाई पनि प्राथमिकताका साथ अघि बढाइने प्रतिबद्धता जनाइन्।
