मानवीय सहायताका लागि भन्दै रुसले युक्रेनविरुद्ध चलिरहेको युद्ध अस्थायी रुपमा रोकेको छ ।
रुसी सञ्चारमाध्यम तासका अनुसार युक्रेका दुई सहरमा आज (शनिबार) अस्थायी युद्धविरामको घोषणा गरिएको हो ।
आफूलाई स्वायत्त राष्ट्र गरेका युक्रेनको डोनेट्स्कस्थित मरिपोल र भोल्नोभाखा सहरमा रुसले युद्धलाई रोकेको हो ।
‘५ मार्चका दिन रुसी समय अनुसार बिहान १० बजेबाट मरिपोल र भोल्नोभाखाका स्थानीयलाई बाहिर निस्किनका लागि मानवीय करिडोर खुला गरिएको छ’ रुसी रक्षा मन्त्रालयलाई उद्धृत गर्दै तासले लेखेको छ, ‘युक्रेन र रुस दुवै पक्षको सहमति पश्चात्त यो निर्णय लिइएको हो ।’
डोनबास गणतन्त्रका प्रमुखहरुको अनुरोधलाई कारण देखाउँदै रुसका राष्ट्रपति भ्लादिमिर पुटिनले फेब्रुअरी २४ मा युक्रेनविरुद्ध युद्धको घोषणा गरेका थिए ।
युक्रेनको राजधनी कीभको दुर्व्यवहार र नरसंहारबाट पीडित बनेको डोनबासको रक्षा गर्न भन्दै रुस युक्रनेमाथि जाइलागेको थियो ।
युद्धको दशौँ दिनमा आएर केही लचक देखाएको रुसले आफ्नो लक्ष्य युक्रेनलाई कब्जा गर्नु नभई निः शस्त्रीकरण रहेको बताउँदै आइरहेको छ ।
युद्धविरामको घोषणाको क्रममा बोल्दै रुसी रक्षा मन्त्रालयका अधिकारीहरुले रुसी सैनिकले युक्रेनका सहरहरुलाई नबनाएको र सर्वसाधारणलाई रुसी सेनाबाट कुनै खाले खतरा नरहेको स्पष्ट पारेको छ ।
रुसी रक्षा मन्त्रालयका अनुसार रुसको एक मात्र योजना युक्रेनी सैन्य पूर्वाधारलाई असक्षम पार्ने मात्र रहेको छ ।
युक्रेनको राजधानी कीभ लक्षित आक्रमणका कारण हजारौँ युक्रेनी देश छाडेर छिमेकी राष्ट्रमा शरण लिन पुगिरहेका छन् ।
सयौँ मानिसको मृत्यु भइसके पनि रुस र युक्रेन युद्धलाई नरोक्ने पक्षमा देखिएका छन् ।
दुवै राष्ट्रबीच युद्धविरामका लागि शान्ति वार्ता भइरहे पनि त्यसले निकास दिन सकिरहेको छैन ।
