विराटनगर- परराष्ट्रमन्त्री शिशिर खनाल र अस्ट्रेलियाकी विदेशमन्त्री सिनेटर पेनी वङबीच नेपाल–अस्ट्रेलिया सम्बन्ध, विपद् सहयोग, जलवायु परिवर्तन, शिक्षा, व्यापार तथा लगानीलगायत विषयमा छलफल भएको छ।मेलबर्नमा बिहीबार भएको भेटवार्तामा दुवै पक्षले नेपाल र अस्ट्रेलियाबीच लामो समयदेखि कायम रहेको मैत्रीपूर्ण सम्बन्धप्रति सन्तुष्टि व्यक्त गर्दै आगामी दिनमा पारस्परिक हितका क्षेत्रमा सहकार्य थप विस्तार गर्ने विषयमा जोड दिएका थिए।
मन्त्री खनालको सचिवालयका अनुसार भेटमा दुई देशबीचको सम्बन्धलाई थप सुदृढ बनाउने तथा साझा हितका विषयमा सहकार्यलाई नयाँ क्षेत्रमा विस्तार गर्ने सम्भावनाबारे छलफल भएको थियो।
भेटवार्ताका क्रममा अस्ट्रेलियाकी विदेशमन्त्री वङले नेपालमा हालै आएको बाढीबाट प्रभावित परिवार तथा समुदायप्रति दुःख व्यक्त गर्दै विपद्पछिको उद्धार, प्रारम्भिक पुनर्लाभ र पुनर्निर्माणका काममा अस्ट्रेलिया नेपालसँगै रहेको बताइन्।
वङले बाढी तथा अन्य विपद्बाट प्रभावित नेपालका लागि थप १५ मिलियन अस्ट्रेलियन डलर सहयोग घोषणा गरिन्। यसअघि अस्ट्रेलियाले आपत्कालीन प्रतिकार्यका लागि घोषणा गरेको ११ मिलियन अस्ट्रेलियन डलर सहयोगमा यो रकम थप हुने जनाइएको छ। नयाँ सहयोग राहत तथा प्रारम्भिक पुनर्लाभका काममा केन्द्रित हुने बताइएको छ।
मन्त्री खनालले विपद्का समयमा अस्ट्रेलिया सरकार तथा अस्ट्रेलियाली जनताबाट प्राप्त मानवीय सहयोगप्रति आभार व्यक्त गरे। संकटका समयमा प्राप्त सहयोगले नेपाल र अस्ट्रेलियाबीचको दीर्घकालीन मैत्रीपूर्ण सम्बन्धलाई थप बलियो बनाएको उनले बताए।
