काठमाडौं । नेपाली कांग्रेसको १५औँ महाधिवेशनअन्तर्गत खुला महामन्त्री पदको मतगणनामा डा. सुनीलकुमार शर्माले दोस्रो स्थानमा रहेका उदयशमशेर राणासँगको मतान्तर घटाएका छन् ।
कुल ७ हजार ४३ मत खसेकोमा हालसम्म ३ हजार ४३५ मत गणना भएको छ । पछिल्लो परिणामअनुसार उदयशमशेर राणाले १ हजार १५९ मतसहित दोस्रो स्थानमा छन् भने सुनीलकुमार शर्माले ९३४ मत प्राप्त गरेका छन् । राणा र शर्माबीच २२५ मतको अन्तर छ ।
यसअघि राणा ७८६ मतसहित दोस्रो स्थानमा थिए भने अमरसिंह पुन मगर ६९५ मतसहित तेस्रो र शर्मा ५२६ मतसहित चौथो स्थानमा थिए । पछिल्लो गणनामा शर्माले पुनलाई उछिन्दै तेस्रो स्थानमा उक्लिएका हुन् । पुन ८१९ मतसहित चौथो स्थानमा झरेका छन् ।
खुला महामन्त्रीतर्फ प्रदीप पौडेलले भने फराकिलो अग्रता कायम राखेका छन् । उनले २ हजार ५५ मत प्राप्त गरेका छन् । पौडेल दोस्रो स्थानमा रहेका राणाभन्दा ८९६ मतले अगाडि छन् ।
यस्तै, गुरुराज घिमिरेले ६७८, नैनसिंह महरले ४२८, शंकर तिवारीले ८२ र डा. सन्तोष उपाध्यायले ४९ मत प्राप्त गरेका छन् ।
नेपाली कांग्रेसमा खुलातर्फ दुई जना महामन्त्री निर्वाचित हुने व्यवस्था छ । हालसम्मको मतगणनामा पौडेल पहिलो र राणा दोस्रो स्थानमा छन् भने शर्माले राणासँगको मतान्तर घटाउँदै प्रतिस्पर्धालाई थप रोचक बनाएका छन् ।
