शक्तिशाली राष्ट्र रुसले छिमेकी राष्ट्र युक्रेनमाथि आक्रमण सुरु गरेसँगै विश्व यतिबेला तरङ्गित बनेको छ ।
राष्ट्रपति भ्लादिमिर पुटिनको घोषणासँगै युक्रेनविरुद्ध सुरु भएको सैन्य आक्रमणको आज दोस्रो दिन हो ।
बिहीबार बिहानबाटै युक्रेनको राजधानी किएभमा क्षेप्यास्त्र प्रहार सुरु भइसकेको छ ।
राजधानी किएभबाहेक अन्य क्षेत्रमा समेत रुसले आक्रमण सुरु गरिसकेको छ ।
रुसी सेनाको आक्रमणबाट हालसम्म एक सय बढी युक्रेनीको मृत्यु भइसकेको युक्रेनी राष्ट्रपति भोलोदिमिर जेलेन्स्कीले अन्तर्राष्ट्रिय सञ्चारमाध्यमसँग दाबी गरेका छन् ।
यता, रुसी राष्ट्रपति पुटिनले सैनिक संरचना र बेसमा मात्रै आक्रमण गर्ने बताएको भएपनि अन्य क्षेत्रमा समेत आक्रमण भइरहेको र युक्रेनी जनताको मृत्यु भइरहेको जेलेन्स्कीले बताएका छन् ।
‘मरे पनि युक्रेनमै मर्छु’
रुसले आफूहरुलाई आक्रमण गर्दा समेत हालसम्म कसैले साथ नदिएको दुखेसो पोख्दै युक्रेनी राष्ट्रपति जेलेन्स्कीले आफू र आफ्नो परिवार मारिए पनि देश छाडेर भागेर कतै नजाने घोषणा गरिसकेका छन् ।
रुसी सेना किभए नजिकै आइसकेको र उनीहरुको मुख्य उद्देश्य आफूलाई समाप्त पार्ने भएको भन्दै जेलेन्स्कीले आफू त्यसको पर्वाह नगरी युक्रेनमा नै बस्ने बताएका छन् ।
‘जवाफी हमला सुरु’
रुसले आक्रमण सुरु गरेसँगै जवाफी हमला थालेको युक्रेनले हालसम्म आठ सय बढी रुसी सैनिकले मारेको बताएको छ ।
त्यसबाहेक, ३० रुसी सैनिक ट्याङ्क र सात जासुसी विमान पनि ध्वस्त पारेको युक्रनेले दाबी गरेको छ । आफ्ना सबै नागरिकलाई रुसविरुद्धको युद्धका लागि तयार रहन युक्रेनले आग्रह गरिसकेको छ ।
आफ्नो राष्ट्रका पूरै सेनालाई युद्धमा उत्राने घोषणा गरिसकेको राष्ट्रपति जेलेन्स्कीले १८ देखि ६० वर्षका पुरुषलाई देश नछाड्न आदेशसमेत दिइसकेको छ ।
‘मुकदर्शक विश्व’
रुस–युक्रेन विषयमा हालसम्म कुनै पनि राष्ट्रले आफ्नो औपचारिक धारणा सार्वजनिक गरिसकेका छैनन् ।
अमेरिकी राष्ट्रपति जो बाइडेनले रुस सोभियत सङ्घ बन्ने बाटोमा अघि बढिरहेको आरोप लगाए पनि यस विषयमा अमेरिकाले के गर्छ भन्नेबारे प्रष्ट पारिसकेको छैनन् ।
नेटो राष्ट्रमा हमला भए आफू चुप लागेर नबस्ने बताए पनि रुस–युक्रेन विवादमा अमेरिका मौन छ ।
अन्तर्राष्ट्रिय सञ्चारमाध्यका अनुसार फ्रान्सेली राष्ट्रपति इमानुयल म्याक्रोले भने रुसी राष्ट्रपति पुटिनलाई फोन गरेर रुस–युक्रेन विषयमा गम्भिर छलफल गरेका थिए ।
तर त्यसले के–कस्तो निचोड दियो भन्नेबारे रुस र फ्रान्स दुवै राष्ट्रले हालसम्म केही सार्वजनिक गरेका छैनन् ।
शक्ति राष्ट्रहरु नै मौन रहेको बेला विश्वका अन्य राष्ट्रहरु मुकदर्शक बनेर बसिरहेका छन् ।
रुसको आक्रमण बढेसँगै युक्रेनीहरु भने देश छाडेर छिमेकी राष्ट्र प्रवेश गर्ने तयारी गरिरहेका छन् ।
किएभ छाडेर जानेहरुको भीड बढेपछि सडकमा मानिसको लाम र सवारी साधन जाममा परेका छन् ।
हेर्नुहाेस् रुसकाे आक्रमण पछिकाे युक्रेनकाे तस्बिरः
