काठमाडौं । नेकपा एमालेका अध्यक्ष केपी शर्मा ओलीले बूढीगण्डकीमा आएको बाढीपछि उद्धार तथा राहतमा प्रभावकारी रूपमा जुट्न सरकारलाई आग्रह गरेका छन् ।
एमालेको सम्पर्क विशेष संगठन कमिटीले आइतबार काठमाडौंमा आयोजना गरेको ‘मिसन पार्टी जागरण अभियान तथा अगुवा कार्यकर्ता भेला’लाई सम्बोधन गर्दै ओलीले विपद्को समयमा सरकारले सबै पक्षलाई समेटेर काम गर्नुपर्ने बताए ।
उनले विगतमा बाढी तथा विपद्का समयमा सरकारी हेलिकोप्टरको प्रयोग र उद्धार कार्यमा कमजोरी भएको उल्लेख गर्दै त्यस्ता घटना दोहोरिन नदिन सरकारको ध्यानाकर्षण गराए ।
ओलीले सरकारी हेलिकोप्टरलाई कुनै संस्था वा व्यक्तिको निजी सम्पत्तिजस्तो व्यवहार नगर्न पनि आग्रह गरे । उनले विपद्का बेला आवश्यकताका आधारमा सरकारी स्रोतसाधनको प्रभावकारी प्रयोग गर्नुपर्ने बताए ।
भदौ १० गते त्रिशूलीमा बाढी आउँदा सरकारले गरेको कमजोरी फेरि नदोहोर्याउन आग्रह गर्दै ओलीले प्रभावितको उद्धारमा सरकारको प्रभावकारी भूमिका हुनुपर्ने बताए ।
‘यसपटक त्यस्ता कुरा नदोहोरिऊन् भनेर म सरकारलाई आग्रह गर्न चाहन्छु । सरकार फराकिलो मन र फराकिलोपनका साथ उद्धार कार्यमा अगाडि बढोस्,’ ओलीले भने ।
विपद्को समयमा राजनीतिक दलहरूबीच सहकार्य आवश्यक रहेको उल्लेख गर्दै ओलीले सरकारले सर्वदलीय समिति बनाउनसमेत नसकेको आरोप लगाए ।
