नेपाली राष्ट्रिय टोलीका कप्तान सन्दीप लामिछाने नयाँ संस्करणको इन्डियन प्रिमियर लिग (आइपिएल) टी–२० क्रिकेटमा ‘अन्सोल्ड’ भएका छन् ।
यसअघिको सिजनमा समेत नेपाली टोलीका कप्तान लामिछानेलाई कुनै टिमले भित्र्याएको थिएन ।
आइपिएलको मेगा अक्सनमा परे पनि उनलाई कुनैपनि टिमले बोली लगाएनन् ।
बैङ्गलोरमा भएको आइपिएलको अक्सनमा उनी बिकेनन् ।
अक्सनमा सन्दीपले आफ्नो मूल्य ४० लाख भारतीय रुपैयाँ (भारु) तोकेका थिए ।
यस वर्षका लागि उनको आधार मूल्य ६४ लाख नेपाली भएपनि कुनै पनि टिमले चासो देखाएन ।
शनिबार बिक्न नसकेका लामिछानेका लागि आइतबार बिक्री हुने आशा रहेको थियो तर अक्सन टुंगिदासम्म लामिछाने अनसोल्ड रहे ।
मेगा अक्सनका लागि नेपालका १४ जना खेलाडीले नाम दर्ता गराएपनि मेगा अक्सनमा सन्दीपको मात्र नाम छनोट भएको थियो ।
तर उनी यसपटक पनि बिकेनन् ।
आइपिएल २०२२ को प्लेअर अक्सनका लागि कुल एक हजार दुई सय १४ खेलाडीले नाम दर्ता गराउँदा नेपालबाट १५ खेलाडीको नाम रहेको थियो ।
आइपिएलका लागि नेपालबाट कप्तान लामिछानेसहित आसिफ शेख, पवन सरार्फ, सन्दीप जोरा, कुशल भुर्तेल, रोहित कुमार पौडेल, सुशान भारी, आरिफ शेख, अभिनाश बोहरा, विनोद भण्डारी, शरद भेषावकर, कुशल मल्ल, करण केसी, सोमपाल कामी र दीपेन्द्रसिंह ऐरीले नाम दर्ता गराएका थिए ।
अहिलेसम्म नेपालबाट कप्तान सन्दीपले मात्र आइपिएल खेलेका छन् ।
सन्दीपले यसअघि तीन सिजन दिल्ली क्यापिटल्सबाट आइपिएल खेलेका थिए ।
दिल्लीले सन्दीपलाई सन् २०१८ को अक्सनमा न्युनतम मूल्य २० भारुमा अनुबन्ध गरेको थियो ।
सन्दीपले तीन सिजन खेल्दा कुल ९ खेलमा १३ विकेट लिएका थिए ।
तर सन् २०२१ को अक्सनमा उनी बिकेका थिएनन् ।
अहिले सन्दीप विश्वककपको ग्लोबल छनोटका लागि ओमानमा छन् ।
सन्दीप नेतृत्वको टिमले अहिले ग्लोबल छनोटको तयारीस्वरूप चारदेशीय टी-ट्वान्टी सिरिज खेलिरहेको छ ।
चार देश सम्मिलित सिरिजमा नेपालसहित ओमान, युएई र आयरल्यान्ड रहेका छन् ।
हालैमात्र राष्ट्रिय टिम कप्तान बनेका हुन् ।
नेपाल क्रिकेट सङ्घ (क्यान) ले ज्ञानेन्द्र मल्ललाई कारबाही गर्दै सन्दीपलाई कप्तान बनाएको थियो ।
आइपिएलमा यसपटक १० टोलीको सहभागिता रहनेछ ।
आइपिएलको औपचारिक घोषणा भने हुने बाँकी छ ।
