नेपाली राष्ट्रिय क्रिकेट टिमका कप्तान सन्दीप लामिछानेले नेपाल आइसिसी पुरुष टी–ट्वान्टी विश्वकपमा छनोट हुनेमा आफू विश्वस्त रहेको बताएका छन् ।
नेपाली टोलीले आफ्नो क्षमताअनुसार खेलेमा यसै वर्ष अस्ट्रेलियामा हुने विश्वकपका लागि छनोट हुने विश्वास व्यक्त गरेका हुन् ।
कप्तान लामिछानेले नेपाली टिमसँग दबाब झेल्न सक्ने क्षमता रहेको बताए ।
हाल नेपाल आइसिसी टी-ट्वान्टी विश्वकप ग्लोबल छनोटको तयारीमा छ ।
छनोट खेलमा नेपाल समूह ‘ए’ मा परेको छ ।
ओमानमा फेब्रुअरी १७ तारिखदेखि सुरु हुने ग्लोबल छनोटको समूहमा नेपालसहित ओमान, बहराइन, क्यानडा, जमर्नी, आयरल्यान्ड, फिलिपिन्स र युएई गरी आठ टोली छन् ।
आठ टोलीलाई पनि दुई समूहमा विभाजन गरिएको छ । नेपालको समूहमा क्यानडा, ओमान र फिलिपिन्स छन् ।
अर्को समूहमा आयरल्यान्ड, युएई, बहराइन र जमर्नी छन् ।
नेपालले उद्घाटन खेलमा आयोजक ओमानसँग खेल्नेछ ।
ग्लोबल छनोट खेलअघि नेपालले ओमानमा चार देश सम्मिलित सिरिज पनि खेल्नेछ ।
सिरिजमा नेपालसहित ओमान, युएई र आयरल्यान्ड रहेका छन् ।
यसैगरी ग्लोबल छनोटका लागि समूह ‘बी’ मा जिम्बावे, हङकङ, जर्सी, नेदरल्यान्ड्स, पपुवा न्युगिनी, सिंगापुर, युगान्डा र अमेरिका छन् ।
समूह ‘बी’ को छनोट खेल भने जुलाई ११ देखि १७ सम्म जिम्बावेमा हुनेछ ।
दुवै समूहमा शीर्ष दुई टोलीले विश्वकपमा स्थान बनाउनेछन् ।
सिरिज र ग्लोबल छनोट खेलका लागि नेपालले कीर्तिपुर मैदानमा तयारी गरिरेहको छ ।
ओमान भ्रमणका लागि नेपालले सन्दीप लामिछानेको कप्तानीमा १६ सदस्यीय खेलाडी टोलीको घोषणा समेत गरिसकेको छ ।
नेपालले यसअघि सन् २०१४ मा टी–२० विश्वकप खेलेको थियो ।
नेपाली टोली :
सन्दीप लामिछाने (कप्तान), कुशल भुर्तेल, ज्ञानेन्द्र मल्ल, दिपेन्द्रसिंह ऐरी, शरद भेषवाकर, करण केसी, आरिफ शेख, कुशल मल्ल, आसिफ शेख, कमलसिंह ऐरी, शाहब आलम, अविनाश बोहरा, प्रदिप ऐरी, जितेन्द्र मुखिया, विवेक यादव र लोकेश बम ।
