स्पेनिस क्लब एथ्लेटिको मड्रिडका स्ट्राइकर लुइस स्वारेजले पूर्वक्लब बार्सिलोनाविरुद्ध गोल गरेपछि दोस्रो पटक माफी मागेका छन् ।
आइतबार ला लिगाअन्तर्गत बार्सिलोनाको घरेलु मैदान क्याप नोउमा पूर्वक्लबविरुद्ध गोल गरेका उनले माफी मागेका हुन् ।
उरुग्वेका स्टार स्वारेजले खेलको ५८औँ मिनेटमा डिफेन्डर जोसे मारिया जिमिनेजको पासमा गोल गरेका थिए ।
सो गोलपछि सहकर्मी सेलिब्रेसनका लागि स्वारेज नजिक आएका थिए । तर उनले भव्य सेलिब्रेसन नगरेर दुई हात जोडेर माफी मागेका हुन् ।
उनले दुवै हातको बीचमा बल राखी हात जोडेर पूर्वक्लब बार्सिलोनाका समर्थकतिर फर्किएर माफी मागे ।
क्याप नोउमा प्रत्यक्ष खेल हेरिरहेका ७४ हजार दुई सय २१ दर्शकसँग उनले माफी मागेका हुन् ।
स्वारेजले पूर्वक्लब बार्सिलोनाविरद्ध गोल गर्दै माफी मागेको यो पहिलो पटक भने होइन ।
२३ अक्टोबर २०२१ मा ला लिगाअन्तर्गत घरेलु मैदानमा बार्सिलोनाविरुद्ध पहिलो गोल गर्दै स्वारेजले माफी मागेका थिए ।
त्यसबेला एथ्लेटिकोले बार्सिलोनामाथि २–० गोलको जित निकालेको थियो । आज भने बार्सिलोनाले एथ्लेटिकोमाथि ४-२ गोलको जित निकाल्यो ।
