एट्लेटिको मड्रिडलाई ४–२ ले पराजित गर्दै बार्सिलोना ला लिगा अङ्क तालिकाको चौथो स्थानमा उक्लिएको छ ।
रियलले सुरुवाती अग्रता उल्टाउँदै घरेलु मैदान क्याम्प नोउमा बार्सिलोना सानदार जित दर्ता गर्न सफल भएको हो ।
बार्सिलोनालाई जिताउन जोर्डी अल्बा, गाभी, रोनाल्ड आराउखा र डानी आल्भेसले गोल गरे ।
एट्लेटिकोका लागि कारास्को र लुइस स्वारेजले गोल गरे । खेलको सुरुवातमा नै एट्लेटिको मड्रिडले गोल गर्दै अग्रता लिएको थियो ।
एट्लेटिकोका लागि कारास्कोले आठौं मिनेटमा गोल गरेका थिए । तर दुई मिनेट नबित्दै एट्लेटिकोको अग्रतालाई बार्सिलोनाले बराबरी गर्यो ।
पहिलो हाफको १०औं मिनेटमा जोर्डी अल्बाले गोल गर्दै बार्सिलाेनालाई खेलमा फर्काए ।
बार्सिलोनाका लागि दोस्रो गोल गाभीले गरे । २१औं मिनेटमा हेडमार्फत सुन्दर गोल गर्दै गाभीले खेलमा बार्सिलोनालाई अग्रता दिलाए ।
त्यसपछि खेलमा फर्किने प्रयास एट्लेटिकोबाट पटक–पटक भएपनि त्यो सफल भएन ।
पहिलो हाफ सकिन लाग्दै बार्सिलनोले अर्काे गोल थप्यो ।
खेलको ४३औं मिनेटमा रोनाल्ड आराउखो गोल गर्दै बार्सिलोनाले आफ्नो अग्रता दुई गोलले बढायो । फेरान टोरेसको प्रहार पोस्टमा ठोकिएर फर्किएर आएपछिको रिबन्ड बलमा आराउखो गोल गर्न सफल भए ।
पहिलो हाफमा ३–१ को अग्रता लिएको बार्सिलोनाले दोस्रो हाफको सुरुवातमै अर्काे गोल थप्यो ।
बार्साको लागि चौथो गोल ४९औं मिनेटमा डानी आल्भेसले गरे ।
खेलको ५७औं मिनेटमा टर स्टेगनले सुन्दर सेभ गर्दै एट्लेटिकोको अग्रता कम गर्ने प्रयास विफल बनाए । तर सोही अवसरमा पाएको कर्नर एट्लेटिको गोल गर्न सफल भएको थियो ।
जिमिनेजको हेडर पासमा लुइस स्वारेज गोल गर्न सफल भए ।
६९औं मिनेटमा डानी आल्भेसले रातो कार्ड पाउँदै मैदान छाड्न बाध्य भए । बार्सिलोनाको पेनाल्टी क्षेत्र नजिकै उनले कारास्कोको खुट्टामा हिर्काएर लडाएका थिए ।
आजको खेलमा जित हात पारेसँगै एट्लेटिको दुई अङ्कले पछि पार्दै बार्सिलोना ला लिगाको चौथो स्थानमा उक्लिएको छ ।
२२ खेलबाट ५० अङ्क बटुलेको रियल मड्रिड तालिकाको शीर्ष स्थानमा छ ।
रियलभन्दा एक खेल बढि खेलेको सेभिल्ला ४७ अङ्कका साथ दोस्रो स्थानमा रहँदा २२ खेल खेलेको रियल बेटिस ४० अङ्कका साथ ला लिगाको तेस्रो स्थानमा छ ।
