दशरथ रङ्गशालामा जारी नेपाल र मोरिससबीचको दोस्रो मैत्रीपूर्ण खेलको पहिलाे हाफमा नेपालले १–० को अग्रता लिएको छ ।
खेलको ११औं मिनेटमा नै नेपालले गोल गरेको थियाे ।
नविन गुरुङको कर्नरमा सुजल श्रेष्ठले गोल गरे । गुरुङको कर्नरमा आशिष लामाले बललाई पहिले प्रहार गरेका थिए ।
तर पेनाल्टी क्षेत्रभित्र आएको सो बललाई पुजन उपरकोटीले फिल्क र श्रेष्ठले ट्याप इन गर्दै गोल गर्न सफल भए ।
खेलको १२औं मिनेटमा नेपालले ठूलो खतरा टारेको थियो ।
मोरिसस पेनाल्टीमा चुक्दा नेपाल अग्रता कायम राख्न सफल भयो ।
दिनेश राजवंशीले मोरिससका कप्तान सोफीलाई पेनाल्टी क्षेत्रभित्र लडाएपछि मोरिससले पेनाल्टीको मौका पाएको थियो ।
पेनाल्टी क्षेत्र बाहिरबाट मोरिससका खेलाडीले गरेको प्रहारलाई नेपालका गोलरक्षक किरन चेम्जोङले बचाए पनि आएको रिबन्डमा गोलको प्रयास गर्न सोफी अघि बढेका थिए ।
अघि बढेका सोफीलाई नेपाली डिफेन्डर राजवंशीले लडाएपछि मोरिससले पेनाल्टी पाएको यियो ।
सो पेनाल्टी मोरिससका कप्तान सोफी आफैंले प्रहार गरेका थिए ।
तर सोफीको पेनाल्टी प्रहारलाई गोलरक्षक चेम्जोङले उत्कृष्ट बचाउ गरेपछि मोरिसस बराबरी गोल फर्काउन असफल रह्यो ।
खेलको सुरुवातबाट नै दुवै टोली आक्रमक रुपमा प्रस्तुत भएका थिए ।
खेलको दोस्रो मिनेटमा नै नेपालले फाउल पाएको थियो । मोरिससका कप्तान सोफीले पूजन उपरकोटीलाई लडाएका थिए ।
तर आफ्नै भागको पाएको फ्रिकिकमा नेपालले खासै मुभ बनाउन सकेन ।
छैटौँ मिनेटमा नेपालले गोल गर्न अवसर खेर फाल्यो ।
लेफ्ट फ्ल्याङ्कबाट अन्जन विष्टले निकालिदिएको बलमा दर्शन गुरुङले प्रयास गरे पनि त्यो पोस्टभन्दा निकै माथि हुइकिएको थियो ।
३७औं मिनेटमा नेपाल अग्रता दोब्बर बनाउनबाट चुक्यो । मोरिससका गोलरक्षक र डिफेन्डरको तालमेल नमिल्दा तेज तामाङले मौका पाएका थिए ।
मोरिससका डिफेन्डरले मिस पास गरेपछि तामाङले करिब ३५ यार्ड टाढा अवसर पाएका थिए ।
मोरिससका गोलरक्षक पोस्टमा नभएको बेला तामाङले प्रयास गरे पनि बलले पोस्टको दिशा लिन नसक्दा नेपाल खेलको स्कारे २–० बनाउनबाट चुक्यो ।
४३औं मिनेटमा ब्रास खेलमा बराबरी गोल गर्नबाट चुक्यो । पेनाल्टी क्षेत्र बाहिरबाट उनले गरेको लङ रेन्ज प्रहारलाई गोलरक्षक चेम्जोङले रोकेका थिए ।
