फुटबल जगतका लागि एर्लिङ हालान्ड नयाँ नाम हैन । नर्वेजियन स्टार हालान्ड विश्वस्तरीय खेलाडीको सूचीमा शीर्ष स्थान पर्छन् ।
यीनै २१ वर्षे युवा स्टारलाई आ–आफ्नो क्लबमा भित्र्याउन विश्वभरका चर्चित क्लबहरू प्रतिस्पर्धामा छन् ।
तीमध्ये दुई स्पेनिस क्लब रियल मड्रिड र बार्सिलोना हात धोएर हालान्डकाे पछि लागि परेका छन् ।
आर्थिक सङ्कटका कारण क्लबमा निम्तिएको समस्याले आफ्ना स्टार खेलाडी लियोनल मेस्सीलाई क्लबबाट बिदा गर्न बाध्य बनेको बार्सिलोना यतिबेला जसरी भएपनि हालान्डलाई क्लबमा ल्याउन लागि परेको छ ।
जर्मन लिग बुन्डेसलिगामा बोरुसिया डर्टमन्डबाट व्यवसायीक फुटबल खेलिरहेका हालान्डलाई बार्सिलोनामा ल्याउन क्लबका अध्यक्ष जौन लापोर्टा कसरत गरिरहेका छन् ।
तर बार्सिलोनाको परिचित प्रतिद्वन्द्वी रियल मड्रिड पनि हालान्डलाई क्लबमा अनुबन्ध गर्न सङ्घर्ष गरिरहेको छ । तर फ्रान्सेली क्लब पेरिस सेन्ट जर्मेन (पिएसजी) का फरवार्ड केलियन एमबाप्पे र हालान्डमध्ये कसलाई भित्र्याउने भन्नेबारे रियलले निर्णय गर्न सकिरहेको छैन ।
रियल र बार्सिलोनाले हालान्डलाई क्लबमा ल्याउने तीव्र चाहना देखाइरहेको बेला इंग्लिस प्रिमियर लिग क्लब म्यानचेस्टर सिटी र चेल्सीको नजर पनि नर्वेजियन स्टारमा केन्द्रीत छ । यी चारबाहेक पिएसजीले पनि हालान्डलाई पिछा गरिरहेको छ ।
फ्रान्सेली स्टार एमबाप्पेले क्लब छाडे मेस्सी र नेयमारसँगै हालान्डलाई आफ्नो क्लबको आक्रमण पङ्क्तिको जिम्मेवारी दिने तयारीमा पिएसजी छ ।
रेडबुल स्लास्बर्गबाट सन् २०२० को सिजनमा डर्टमन्ड आएका हालान्डले ८२ खेलमा ७९ गोल गरिसकेका छन् । गोल गर्नबाहेक अवसर सिर्जना गर्न पनि माहिर हालान्डको नाममा बोरुसियाका लागि २८ असिस्ट छन् ।
क्लब फुटबलबाहेक राष्ट्रिय टोलीका समेत नियमित सदस्य रहेका हालान्डले सिनियर टोलीबाट डेब्यु गरेयता खेलेका १५ खेलमा १२ गोल गरिसकेका छन् ।
