काठमाडौं । नेपाल क्रिकेट संघ (क्यान) ले नेपालले घरेलु मैदानमा भारत ए क्रिकेट टोली विरुद्ध तीन खेलको टी–२० अन्तर्राष्ट्रिय सिरिज खेल्ने जनाएको छ। सिरिज काठमाडौंस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा आयोजना हुनेछ।
यो सिरिजको सहमति स्कटल्यान्डमा आयोजित अन्तर्राष्ट्रिय क्रिकेट परिषद् (आईसीसी) सम्मेलनका क्रममा क्यानका अध्यक्ष चतुरबहादुर चन्द, सचिव पारस खड्का र भारतीय क्रिकेट नियन्त्रण बोर्ड (बीसीसीआई) का सचिव देवजित सैकिया बीच भएको बैठकपछि तय भएको हो।
सिरिज आगामी डिसेम्बर ९ देखि १३ तारिखसम्म सञ्चालन हुनेछ। पहिलो खेल डिसेम्बर ९, दोस्रो खेल डिसेम्बर ११ र तेस्रो तथा अन्तिम खेल डिसेम्बर १३ मा हुनेछ। भारत ‘ए’ जस्तो बलियो टोलीसँग घरेलु मैदानमा हुने यो सिरिज नेपाली टोलीका लागि अन्तर्राष्ट्रिय अनुभव बटुल्ने र आगामी प्रतियोगिताको तयारीका दृष्टिले महत्वपूर्ण मानिएको छ।
