काठमाडौं । साविक विश्वविजेता अर्जेन्टिनाले फिफा विश्वकप २०२६ को नकआउट चरणमा पुगेको छ । समूह ‘जे’ मा रहेको अर्जेन्टिनाले अस्ट्रियामाथि २–० को जित निकाल्दै अन्तिम ३२ मा स्थान पक्का गरेको हो ।
डलासस्थित एटी एन्ड टी स्टेडियममा भएको खेलमा कप्तान लियोनेल मेस्सी नै नायक बने । उनले दुवै गोल गर्दै विश्वकप इतिहासमा अर्को स्वर्णिम अध्याय थपे ।
खेलको नवौं मिनेटमै पेनाल्टी अवसर पाए पनि मेस्सीले त्यसलाई सदुपयोग गर्न सकेनन् । तर त्यसपछि उनले आफू किन अझै विश्व फुटबलका सबैभन्दा निर्णायक खेलाडी हुन् भन्ने फेरि प्रमाणित गरे ।
पहिलो हाफको ३८औँ मिनेटमा थियागो आल्माडा र फाकुन्डो मेडिनाको संयोजनमा आएको बललाई उत्कृष्ट फिनिसिङ गर्दै अर्जेन्टिनालाई अग्रता दिलाए । त्यसपछि इन्जुरी समयमा अर्को गोल थप्दै उनले टोलीको जित पक्का गरे ।
योसँगै ३९ वर्षीय मेस्सीले विश्वकपमा २८ खेल खेल्दै १८ गोल पुर्याएका छन् । उनले जर्मनीका मिरोस्लाभ क्लोजेको १६ गोलको पुरानो कीर्तिमानलाई उछिन्दै पुरुष विश्वकप इतिहासकै सर्वाधिक गोलकर्ता बन्ने उपलब्धिलाई अझ मजबुत बनाएका छन् ।
अस्ट्रियाविरुद्धको खेलमा दुई गोल गरेसँगै उनको कीर्तिमान १८ गोलमा पुगेको हो ।
नतिजाले सहज जित देखाए पनि खेल त्यति सजिलो थिएन । राल्फ राङनिकको अस्ट्रियाले सुरुदेखि नै उच्च प्रेसिङमार्फत अर्जेन्टिनालाई दबाबमा राख्ने प्रयास गर्यो । मार्सेल साबिट्जर र जाभेर स्लागरको मिडफिल्डले केही समय एन्जो फर्नान्डेज र रोड्रिगो डे पउललाई स्वतन्त्र रूपमा खेल्न दिएको थिएन ।
तर यही ठाउँमा अर्जेन्टिनाको अनुभव काम आयो । लियोनल स्कालोनीको टोलीले हतार नगरी बल नियन्त्रणमा राख्यो, मिडफिल्डमार्फत खेलको गति नियन्त्रण गर्यो र अवसरको प्रतीक्षा गर्यो । एकपटक खाली स्थान भेट्टाएपछि मेस्सीले त्यसलाई गोलमा परिणत गर्न कुनै गल्ती गरेनन् ।
अल्जेरियाविरुद्ध ह्याट्रिक गरेपछि अस्ट्रियाविरुद्ध दुई गोल थप्दै मेस्सीले लगातार दोस्रो खेलमा टोलीको नेतृत्व गरे । उमेर ३९ पुग्न लाग्दा पनि उनको खेल पढ्ने क्षमता, सही समयमा सही स्थानमा पुग्ने बानी र फिनिसिङ क्षमतामा कुनै कमी देखिएको छैन ।
अर्जेन्टिनाको नयाँ पुस्ता—एन्जो फर्नान्डेज, आल्माडा, म्याक एलिस्टर र जुलियन अल्भारेजसँगको तालमेलले मेस्सीलाई अझ प्रभावकारी बनाइरहेको छ । यही कारणले अर्जेन्टिना फेरि एकपटक उपाधिको बलियो दाबेदारका रूपमा देखिएको छ ।
अस्ट्रियाले हार बेहोरे पनि टोलीको प्रदर्शन निराशाजनक भने थिएन । डिफेन्समा डेभिड अलाबाको नेतृत्व र मिडफिल्डको आक्रामक प्रेसिङले अर्जेन्टिनालाई लामो समयसम्म सहज हुन दिएको थिएन । ्
समूह ‘जे’ बाट नकआउटमा पुग्ने सम्भावना भने अस्ट्रियाका लागि अझै कायम छ । तर त्यसका लागि आगामी खेलहरूमा जित अपरिहार्य बनेको छ।
