एजेन्सी । चार पटकको विश्वविजेता जर्मनीले फिफा विश्वकप २०२६ को समूह ‘ई’ अन्तर्गत आइभोरी कोस्टलाई २–१ ले पराजित गर्दै अन्तिम ३२ अर्थात् नकआउट चरणमा स्थान सुरक्षित गरेको छ।
टोरन्टो स्टेडियममा शनिबार राति भएको प्रतिस्पर्धात्मक खेलमा सुरुआतमा पछि परेको जर्मनीले दोस्रो हाफमा उत्कृष्ट पुनरागमन गर्दै लगातार दोस्रो जित निकालेको हो। यससँगै जर्मनीले दुई खेलबाट ६ अंक जोड्दै समूह चरणको एक खेल बाँकी रहँदै नकआउट यात्रा तय गरेको छ।
आइभोरी कोस्टले पहिलो हाफमा फ्रान्क केसीको गोलमार्फत अग्रता लिएको थियो। जर्मनीका दुई गोल अफसाइडका कारण मान्यता नपाएपछि पहिलो हाफमा उनीहरू दबाबमा परेका थिए। तर प्रशिक्षक जुलियन नागेल्समानले दोस्रो हाफमा गरेका परिवर्तन निर्णायक बने।
बेन्चबाट मैदान प्रवेश गरेका डेनिज उन्डाभ खेलका नायक बने। उनले ६८औँ मिनेटमा बराबरी गोल गर्दै जर्मनीलाई खेलमा फर्काए भने इन्जुरी समयमा अर्को गोल थप्दै टोलीलाई महत्वपूर्ण जित दिलाए। उन्डाभको यो प्रदर्शनसँगै जर्मनी सन् २०१४ पछि पहिलो पटक विश्वकपको नकआउट चरणमा पुगेको हो।
जितपछि प्रशिक्षक नागेल्समानले आफ्नो टोलीले कठिन परिस्थितिमा चरित्र देखाएको भन्दै खेलाडीहरूको प्रशंसा गरेका छन्। उनले टोलीको लक्ष्य अब समूह विजेताका रूपमा अन्तिम ३२ मा प्रवेश गर्ने रहेको बताएका छन्।
समूह ‘ई’ मा जर्मनी ६ अंकसहित शीर्ष स्थानमा छ भने पहिलो खेलमा इक्वेडरलाई हराएको आइभोरी कोस्ट तीन अंकसहित दोस्रो स्थानमा रहेको छ। जर्मनीले अन्तिम समूह खेलमा इक्वेडरसँग खेल्नेछ भने आइभोरी कोस्टले कुरासाओको सामना गर्नेछ।
