एजेन्सी । पाँच पटकको विश्वविजेता ब्राजिलले फिफा विश्वकप २०२६ अन्तर्गत समूह ‘सी’ को दोस्रो खेलमा हाइटीलाई ३–० ले पराजित गर्दै प्रतियोगितामा पहिलो जित दर्ता गरेको छ । फिलाडेल्फियास्थित लिंकन फाइनान्सियल फिल्डमा शनिबार बिहान भएको खेलमा माटेउस कुन्हाले दुई गोल गर्दा भिनिसियस जुनियरले एक गोल थपे ।
मोरक्कोसँग पहिलो खेलमा १–१ को बराबरी खेलेको ब्राजिलले यसपटक सुरुदेखि नै आक्रामक खेल प्रस्तुत गर्यो । खेलको २३औँ मिनेटमा भिनिसियसको प्रहार हाइटीका गोलरक्षक जोनी प्लासिडले रोके पनि फर्किएको बललाई कुन्हाले जाली चुमाउँदै ब्राजिललाई अग्रता दिलाए । त्यसपछि ३६औँ मिनेटमा भिनिसियसकै उत्कृष्ट पासमा कुन्हाले व्यक्तिगत दोस्रो गोल गर्दै अग्रता दोब्बर बनाए ।
पहिलो हाफको अतिरिक्त समयमा लुकास पाकेटाको लामो पासमा भिनिसियस जुनियरले गोल गर्दै ब्राजिललाई ३–० को बलियो अवस्थामा पुर्याए । दोस्रो हाफमा दुवै टोलीले केही अवसर सिर्जना गरे पनि थप गोल हुन सकेन र पहिलो हाफको नतिजा नै अन्तिम बन्यो ।
ब्राजिलका लागि भिनिसियस जुनियर खेलका प्रमुख खेलाडी बने । उनले दुई गोलमा योगदान दिनुका साथै एक गोल पनि गरे । प्रशिक्षक कार्लो एन्सेलोट्टीले यस खेलमा इगोर थियागोको स्थानमा कुन्हालाई मौका दिएका थिए र उनले दुई गोल गर्दै प्रशिक्षकको विश्वासलाई सही साबित गरे ।
यस जितसँगै ब्राजिल चार अंकसहित गोलअन्तरका आधारमा समूह ‘सी’ को शीर्ष स्थानमा उक्लिएको छ भने लगातार दोस्रो हार बेहोरेको हाइटी प्रतियोगिताबाट बाहिरिने पहिलो टोली बनेको छ ।
