क्रिस्टियानो रोनाल्डो डोस सान्टोस एभेइरो, जसलाई सामान्यतया क्रिस्टियानो रोनाल्डो वा सिआर सेभेन भनेर चिनिन्छ । उनी विश्वको सबैभन्दा प्रसिद्ध खेलाडीहरू मध्ये एक हुन् । सन् १९८५ फेब्रुअरी ५ मा एक मजदुर वर्गको परिवारमा जन्मिएका रोनाल्डोको बाल्यकाल कठिनाईले ढाकेको थियो ।
रोनाल्डोकाे बाल्यकाल हेर्दा साधारण परिवारबाट आएका थिए । घर छोडेर आफ्नो सपना पछ्याएका रोनाल्डो १२ वर्षको उमेरमा माडेराबाट लिस्बन पुगेका थिए । पोर्चुगलको मडेइराको सानो टापुमा नम्र सुरुवातबाट उनको यात्रा विश्वव्यापी फुटबल आइकन बन्न असाधारण भन्दा कम छैन ।
उनको बचपनको संघर्षदेखि फुटबल मैदानमा उनको अभूतपूर्व सफलता, विश्वव्यापी चर्चा कायमै छ । आजको फुटबल संसारमा क्रिस्टियानो रोनाल्डो र लियोनल मेस्सी दुई यस्ता नाम हुन्, जसले एउटा पुस्तालाई मात्र होइन, सम्पूर्ण फुटबलको परिभाषा नै बदलिदिएका छन् ।
तर फुटबल समर्थकमाझ सबैभन्दा धेरै बहस हुने विषयमध्ये एक हो मेस्सी कि रोनाल्डो ?
यस विषयमा मेस्सी र रोनाल्डोका समर्थकहरूबीच सधैंजसो विवाद हुने गर्छ । दुवै खेलाडीका समर्थकहरूले आ-आफ्ना खेलाडीलाई गोट (ग्रेटेस्ट अफ अल टाइम) मान्छन् । यी दुई खेलाडीहरूको तुलना वर्षौंदेखि चलिरहेको छ, र अझै पनि जारी छ । दुवै जना आफ्नो खेलमा अत्यन्तै निपूण र महान खेलाडी हुन् ।
उनीहरूले आफ्नो करियरभर अद्भुत कौशल, मेहनत र उत्कृष्ट प्रदर्शन देखाउँदै आएका छन् । हावाको गतिमा दौडिने यी खेलाडीहरूले विश्व फुटबलमा छुट्टै पहिचान बनाएका छन् । आफ्ना-आफ्ना फ्यानका नजरमा दुवै खेलाडी उत्तिकै महान मानिन्छन् । मेस्सी र रोनाल्डोलाई प्रायः एकअर्काको विपरीत चरित्रका रूपमा चित्रण गरिन्छ ।
एकातिर अद्भुत ड्रिब्लिङ र खेल निर्माण गर्ने मेस्सी, अर्कोतिर शारीरिक क्षमता, गति र गोल गर्ने असाधारण दक्षताका धनी रोनाल्डो । तर समयको सत्य के हो भने खेलाडीहरू पनि उमेरसँगै बदलिन्छन्, र उनीहरूको भूमिका पनि त्यहीअनुसार परिवर्तन हुन्छ । अहिले क्रिस्टियानो रोनाल्डो ४१ वर्षका भएका छन् । तर अझै पनि धेरै समर्थकहरूले उनीसँग २० वर्षे प्राइम रोनाल्डोजस्तै प्रदर्शनको अपेक्षा गर्छन् ।
तर अहिलेको अवस्थामा रोनाल्डोलाई प्राइम अवस्थासँग तुलना गर्नु उचित हुँदैन । यस्तो अपेक्षाले उनीमाथि कति ठूलो मानसिक दबाब पर्छ भन्ने कुरा धेरैले महसुस पनि गर्दैनन् । रोनाल्डो भने फिजिकल डोमिनेसन, स्ट्यामिना र स्ट्रेन्थमा आधारित खेलाडी हुन् । उनको मेहनत र अनुशासनलाई संसारले सधैं प्रशंसा गरेको छ । तर यथार्थ के हो भने उमेर बढेसँगै शरीरले पहिले जस्तो साथ दिन सक्दैन । मनले चाहे पनि अब उनको शरीर प्राइम रोनाल्डोजस्तो गति र प्रेसरमा खेल्न तयार हुँदैन ।
तर अहिले उनीसँग प्राइम रोनाल्डोजस्तै प्रदर्शनको अपेक्षा गर्नु भनेको अनावश्यक दबाब सिर्जना गर्नु हो । त्यस्तै, फरक खेल शैली भएका र ३८ वर्षका लियोनल मेस्सीसँग निरन्तर तुलना गर्नु पनि उनीमाथि थप दबाब नै हो । मेस्सीले २०२२ को विश्वकप जितेर आफ्नो देश अर्जेन्टिनाका लागि ऐतिहासिक उपलब्धि हासिल गरिसकेका छन् । तर रोनाल्डोले भने अहिलेसम्म कुनै पनि विश्वकप ट्रफी जित्न सकेका छैनन् ।
यही कारणले पनि उनको सन् २०२६ कोअन्तिम विश्वकप यात्रालाई अझ विशेष र महत्त्वपूर्ण रूपमा हेरिएको छ । यो विश्वकप जित्न उनको लागि सुनौलो अवसर पनि हो । यदि प्रतियोगिताको पछिल्लो चरणमा अर्जेन्टिना र पोर्चुगल आमनेसामने भए भने, फुटबलले इतिहासकै सबैभन्दा महान प्रतिस्पर्धाको अन्तिम दृश्य हेर्न पाइनेछ ।
सायद ‘सर्वकालीन महान’ को बहस कहिल्यै टुंगिने छैन । तर एउटा कुरा निश्चित छ,मेस्सी र रोनाल्डोले फुटबललाई यस्तो युग दिएका छन्, जसको चर्चा आगामी पुस्ताले पनि गरिरहनेछ । रोनाल्डोको इच्छा आफ्नो देशका लागि अन्तिम प्रयास गर्ने हो । यसपटक पोर्चुगललाई पनि धेरैले उपाधिको दावेदारका रूपमा हेरेका छन् ।
त्यसैले रोनाल्डोबाट पुरानो जस्तो गोलको वर्षा वा ड्रिब्लिङको अपेक्षा गर्नुभन्दा पनि उनको अन्तिम विश्वकप यात्रालाई सम्मानका साथ हेरेर मज्जा लिनु नै उपयुक्त हुन्छ । २० अगस्ट २००३ मा १८ वर्षको उमेरमा पोर्चुगलका लागि डेब्यु गरेका रोनाल्डो आफ्नो देशका सर्वाधिक गोलकर्ता र सर्वाधिक खेल खेल्ने खेलाडी हुन् ।
सन् २००६ को जर्मनी विश्वकप त्यही प्रतियोगिता हो, जहाँ रोनाल्डोले विश्वकपमा ‘डेब्यु’ गरेका थिए । त्यतिबेला उनी म्यानचेस्टर युनाइटेडका उदाउँदा स्टार थिए । उनले २००६ को इङ्ग्ल्यान्डविरुद्धको क्वार्टरफाइनलमा निर्णायक पेनाल्टी गोल गरेर पोर्चुगललाई सेमिफाइनल पुर्याएका थिए । २०१० को विश्वकपमा रोनाल्डो विश्वकै महँगा खेलाडी बनिसकेका थिए ।
२०१४ को विश्वकपमा घानाविरुद्ध रोनाल्डोले गोल गरेर लगातार तीन फरक विश्वकपमा गोल गर्ने पहिलो पोर्चुगिज खेलाडी बने । उनी विश्व फुटबलका सर्वश्रेष्ठ खेलाडीमध्येमा गनिन्थे । २०१८ विश्वकपको पहिलो खेलमै उनले स्पेनविरुद्ध विरुद्ध शानदार ह्याट्रिक गरेका थिए । त्यँही विश्वकप मोरक्कोविरुद्ध खेलमा पाँचौं मिनेटमै गोल गर्दै युरोपका सर्वाधिक अन्तर्राष्ट्रिय गोलकर्ता बने रोनाल्डो ।
२०२२ विश्वकपमा घानाविरुद्ध गोल गर्दै रोनाल्डो विश्वकपका पाँच अलग-अलग संस्करणमा गोल गर्ने इतिहासकै पहिलो पुरुष खेलाडी बने ।रोनाल्डोको नाममा च्याम्पियन्स लिगमा सर्वाधिक गोल १४० र असिस्ट ४२, युरोपियन च्याम्पियनसिप गोल १४ र असिस्ट ८ र पोर्चुगलका लागि २२६ खेल खेल्ने क्रममा रोनाल्डोले कीर्तिमानी १४३ गोल गरिसकेका छन् ।
उनी चार विभिन्न क्लबहरूको लागि १०० भन्दामाथि गोल गर्ने एक मात्र खेलाडी हुन् र ९६० भन्दा बढी करियर गोलहरूको साथ सबै समयको अग्रणी गोल स्कोरर हुन् । पाँच पटकका बालन डी अर विजेता रोनाल्डो विश्व फुटबलमा सर्वाधिक अन्तर्राष्ट्रिय गोल गर्ने खेलाडी हुन् ।
