एजेन्सी । पोर्चुगल राष्ट्रिय फुटबल टोलीले फिफा विश्वकप २०२६ को समूह ‘के’ अन्तर्गत आफ्नो अभियान विजयी सुरुआत गर्ने अवसर गुमाएको छ । ह्युस्टनमा बुधबार भएको खेलमा ५२ वर्षपछि विश्वकपमा फर्किएको डीआर कंगो राष्ट्रिय फुटबल टोलीले शानदार पुनरागमन गर्दै पोर्चुगललाई १-१ को बराबरीमा रोक्यो ।
खेलको छैटौं मिनेटमै पोर्चुगलले अग्रता लिएको थियो। पेड्रो नेटोको आकर्षक क्रसमा युवा मिडफिल्डर जोआओ नेभेसले हेडमार्फत गोल गर्दै पोर्चुगललाई उत्कृष्ट सुरुआत दिलाएका थिए। त्यसपछि अधिकांश समय बल नियन्त्रण पोर्चुगलकै पक्षमा रह्यो, तर थप गोल गर्ने स्पष्ट अवसर सिर्जना गर्न भने टोली असफल रह्यो।
पहिलो हाफको इन्जुरी समयमा डिआर कंगोले खेलमा फर्किने मौका पायो। अनुभवी फरवार्ड योआने विस्साले हेडमार्फत बराबरी गोल गर्दै आफ्नो देशका लागि विश्वकप इतिहासकै पहिलो गोल गरेका थिए। यही गोलले डिआर कंगोलाई विश्वकपमा पहिलो अंक दिलाउने ऐतिहासिक उपलब्धि पनि दिलायो।
४१ वर्षका क्रिस्टियानो रोनाल्डोका लागि यो खेल व्यक्तिगत रूपमा ऐतिहासिक बन्यो। उनी विश्वकपको छैटौं संस्करण खेल्ने खेलाडीहरूको सूचीमा पुगे भने विश्वकप खेल सुरु गर्ने सबैभन्दा पाका आउटफिल्ड खेलाडीसमेत बने। तर, कंगोको संगठित रक्षापंक्तिका कारण उनी गोल गर्न असफल रहे। उनका केही अवसर खेर गए भने कुनै पनि प्रहार लक्ष्यमा पर्न सकेन।
मुख्य प्रशिक्षक सेबास्टियन देसाब्रेको टोलीले रक्षात्मक अनुशासन र तीव्र प्रतिआक्रमणको रणनीति अपनाएको थियो। कप्तान सेड्रिक बाकाम्बु, गोलकर्ता विस्सा तथा डिफेन्स लाइनले पोर्चुगलका ब्रुनो फर्नान्डेज, बर्नार्डो सिल्भा र रोनाल्डोलाई खुला अवसर दिन मानेनन्। सीमित अवसर पाए पनि कंगोले त्यसको भरपुर उपयोग गर्यो।
खेलपछि पोर्चुगलका प्रशिक्षक रोबर्टो मार्टिनेजले टोलीले दोस्रो गोलका लागि आवश्यक आक्रामकता देखाउन नसकेको स्वीकार गरे। उनका अनुसार खेलाडीहरूमाथि उपाधि जित्ने दबाब देखिएको थियो, जसले टोलीको स्वाभाविक खेललाई असर पुर्यायो।
सन् १९७४ मा ‘जायरे’ नामबाट विश्वकप खेलेपछि पहिलो पटक फाइनल चरणमा फर्किएको डिआर कंगोले विश्वकप इतिहासमा पहिलो अंक जोड्दै नयाँ इतिहास रच्यो। शक्तिशाली पोर्चुगलविरुद्ध प्राप्त यो बराबरी अफ्रिकी राष्ट्रका लागि जितसरह सावित भएको छ।
अब समूह ‘के’को प्रतिस्पर्धा थप रोचक बनेको छ। पोर्चुगलले अर्को खेलमा जित निकाल्नै पर्ने दबाब महसुस गर्नेछ भने डिआर कंगो आत्मविश्वासका साथ आफ्नो ऐतिहासिक यात्रालाई निरन्तरता दिन मैदान उत्रिनेछ।
