एसियन गेम्स महिला क्रिकेट छनोटअन्तर्गत दोस्रो सेमिफाइनलमा नेपालले मलेसियासामु १२७ रनको लक्ष्य प्रस्तुत गरेको छ।
मलेसियाको बायुमास ओभलमा टस जितेर पहिले ब्याटिङ गरेको नेपालले निर्धारित २० ओभरमा ६ विकेट गुमाउँदै १२६ रन बनाएको हो। सुरुआती विकेटहरू गुमाए पनि कप्तान इन्दु बर्माको जिम्मेवार इनिङ्स र कविता कुँवरको आक्रामक ब्याटिङले नेपाललाई सम्मानजनक योगफलसम्म पुर्याएको हो।
नेपालका लागि कप्तान इन्दु बर्माले अविजित ४६ रनको उत्कृष्ट इनिङ्स खेलिन् भने कविता कुँवरले मात्र १५ बलमा ३३ रन जोड्दै टोलीको स्कोर उकासिन्। १८ ओभरसम्म ५ विकेट गुमाएर ९२ रन बनाएको नेपालले अन्तिम दुई ओभरमा ३४ रन थप्दै मलेसियामाथि दबाब सिर्जना गरेको थियो।
मलेसियाका लागि विनिफ्रेड दुराइसिंगामले २ विकेट लिइन् भने आइसा एलिसा र माहिरा इजातीले समान १–१ विकेट हात पारे।
यो खेल नेपालको लागि निकै महत्वपूर्ण मानिएको छ। यदि नेपालले मलेसियालाई पराजित गर्न सफल भयो भने टोली सिधै आगामी एसियन गेम्सका लागि छनोट हुनेछ।
यसअघि भएको पहिलो सेमिफाइनलमा थाइल्यान्ड ले चीन लाई पराजित गर्दै फाइनलमा स्थान बनाउनुका साथै एसियन गेम्सको टिकट समेत सुरक्षित गरिसकेको छ।
नेपाल यो खेलमा पराजित भए पनि एसियन गेम्स पुग्ने सम्भावना समाप्त हुने छैन। तेस्रो स्थानका लागि हुने खेलमा चीनलाई हराउन सके नेपालले पनि एसियन गेम्समा स्थान बनाउन सक्नेछ।
यससँगै अहिले सबैको ध्यान मलेसियाविरुद्धको दोस्रो इनिङ्समा केन्द्रित भएको छ, जहाँ नेपाल ऐतिहासिक उपलब्धिको नजिक पुगेको छ।
