विराटनगर । विराटनगर महानगरपालिकामा आइतबार (आज)देखि अन्तर वडास्तरीय फुटबल प्रतियोगिता ‘मेयर कप २०८३’ सुरु हुँदै छ।
विराटनगर-१९ नम्बर वडा कार्यालयको आयोजना तथा पोखरियास्थित युथ केयर एकेडेमीको संयोजनमा आजबाट सुरु हुन लागेको यो प्रतियोगिताको उद्घाटन विराटनगर महानगरपालिकाका मेयर नागेश कोइरालाले गर्ने कार्यक्रम रहेको छ ।
प्रतियोगितामा महानगरका विभिन्न १० वटा वडाहरूको सहभागिता रहनेछ। सहभागी हुने वडाहरूमा १, २, ३, ४, ११, १३, १५, १६, १७ र १९ रहेका छन् ।
आयोजकका अनुसार सहभागिताका लागि महानगरका सबै १९ वटै वडामा समन्वय गरिएको भए तापनि १० वटा वडाले मात्र प्रतिस्पर्धामा भाग लिएका हुन् । प्रतियोगिताका सबै खेलहरू वैजनाथपुरस्थित खेल मैदानमा आयोजना गरिनेछ ।
जेठ ३ गतेसम्म चल्ने यस प्रतियोगिताको विजेता टोलीले ट्रफीसहित ८० हजार रुपैयाँ नगद प्राप्त गर्नेछ भने उपविजेता टोलीले ४० हजार रुपैयाँमा चित्त बुझाउनु पर्नेछ ।
युथ केयर एकेडेमीका अध्यक्ष विक्रम कार्कीका अनुसार ८ दिनसम्म चल्ने यस खेलकुद महोत्सवमा विभिन्न विधागत पुरस्कारको पनि व्यवस्था गरिएको छ ।
जसअनुसार सर्वाधिक गोलकर्ता, उत्कृष्ट स्ट्राइकर, गोलकिपर, मिडफिल्डर, डिफेन्डर, प्रशिक्षक र उदयमान खेलाडीलाई विशेष पुरस्कारद्वारा सम्मान गरिने अध्यक्ष कार्कीले जानकारी दिए ।
