काठमाडौं – अखिल नेपाल फुटबल संघ (एन्फा) ले चीनसँग हुने तय भएको अन्तर्राष्ट्रिय मैत्रीपूर्ण फुटबल खेल स्थगित भएको जानकारी दिएको छ।
एन्फाका अनुसार चैत १२ गते दशरथ रंगशालामा आयोजना हुने भनिएको उक्त खेल आवश्यक पूर्वाधार र स्वीकृति नपाएपछि स्थगित गरिएको हो।
एन्फाले राष्ट्रिय खेलकुद परिषद् (राखेप) सँग रंगशाला र खेल सञ्चालनका लागि स्वीकृति माग्दै पत्राचार गरेको थियो। तर राखेपले फ्लडलाइट, स्कोर बोर्ड लगायतका आवश्यक पूर्वाधार उपलब्ध गराउन नसक्ने जानकारी दिएपछि खेल सञ्चालन हुन नसकेको जनाइएको छ।
एन्फाले खेल मैदान उपलब्ध गराइदिन र सञ्चालन स्वीकृति दिन गरेको आग्रहसमेत पूरा नभएकाले खेल स्थगित गर्नुपरेको जनाएको छ।
यस घटनाबाट नेपाली फुटबल समर्थकहरूमा परेको असुविधाप्रति एन्फाले क्षमायाचना गरेको छ।
