काठमाडौं — टी–२० अन्तर्राष्ट्रिय क्रिकेटमा नेपाल र इटालीबीच अहिलेसम्म कुनै खेल भएको छैन। तर, ५० ओभरको फर्म्याटमा भएका तीन भेटमा नेपालले इटालीलाई पराजित गरेको इतिहास छ। १३ वर्षपछि इटालीसँग खेल्न लागेको नेपाल १२ वर्षपछि विश्वकपमा जित निकाल्ने लक्ष्यका साथ मैदानमा उत्रँदैछ। नेपालले सन् २०१४ मा अफगानिस्तानलाई हराएयता विश्वकपमा जित हात पार्न सकेको छैन।
दुवै टोली प्रतियोगिताको दोस्रो खेल खेल्दै छन्। पहिलो खेलमा नेपाल इंग्ल्याण्डसँग ४ रनले पराजित भएको थियो। पराजित भए पनि नेपाल दोस्रो खेलमा सुधारिएको प्रदर्शनसहित जित निकाल्ने लक्ष्यमा छ। इटाली भने स्कटल्यान्डसँग ७३ रनले पराजित भएको थियो।
सुपर ८ मा पुग्ने सम्भावना कायम राख्न दुवै टोलीलाई फराकिलो जित आवश्यक छ। समूह ‘सी’ मा नेपाल, इटाली, इंग्ल्याण्ड, वेस्ट इन्डिज र स्कटल्यान्ड रहेका छन्। समूहमा लगातार दुई जितसहित वेस्ट इन्डिज ४ अंकका साथ शीर्ष स्थानमा छ। एक जित र एक हार बेहोरेका स्कटल्यान्ड र इंग्ल्याण्ड समान २ अंकसहित क्रमशः दोस्रो र तेस्रो स्थानमा छन्, जहाँ नेट रनरेटका आधारमा स्कटल्यान्ड अगाडि रहेको छ। नेपाल चौथो र इटाली पाँचौँ स्थानमा छन्।
समूह चरणबाट शीर्ष दुई टोलीले सुपर ८ मा स्थान बनाउने प्रावधान छ।
यसैबीच, समूह ‘बी’ अन्तर्गत श्रीलंका र ओमानबीच खेल हुँदैछ। श्रीलंकाको पाल्लेकेलेमा हुने उक्त खेल नेपाली समयअनुसार बिहान ११:१५ बजे सुरु हुनेछ। श्रीलंकाले पहिलो खेल जितेको छ भने ओमानले हार बेहोरेको छ।
त्यस्तै समूह ‘ए’ अन्तर्गत भारत र नामिबियाबीच दिल्लीमा खेल हुँदैछ। नेपाली समयअनुसार साँझ ७:१५ बजे सुरु हुने उक्त खेलमा भारत पहिलो जितलाई निरन्तरता दिने लक्ष्यमा छ भने नामिबिया पहिलो जितको खोजीमा रहनेछ।
