काठमाडौं — आईसीसी टी–२० विश्वकप अन्तर्गत समूह ‘ए’को खेलमा पाकिस्तानले अमेरिकामाथि ३२ रनको जित निकाल्दै लगातार दोस्रो जित दर्ता गरेको छ। मंगलबार राति भएको खेलमा पाकिस्तानले अमेरिकालाई पराजित गरेको हो।
पहिला ब्याटिङ गरेको पाकिस्तानले निर्धारित २० ओभरमा ९ विकेट गुमाउँदै १९० रन बनायो। १९१ रनको लक्ष्य पछ्याएको अमेरिकाले २० ओभरमा आठ विकेटको क्षतिमा १५८ रन मात्र बनाउन सक्यो।
पाकिस्तानका लागि ओपनर साहिबजादा फरहानले विस्फोटक ब्याटिङ गर्दै सानदार अर्धशतक बनाए। उनले ४१ बलमा ६ चौका र पाँच छक्काको मद्दतमा सर्वाधिक ७३ रन जोडे। कप्तान बाबर आजमले ३२ बलमा ४६ रन बनाउँदा सादाब खानले १२ बलमा ३० रनको योगदान दिए।
अमेरिकाका लागि श्याड्ली भान शाल्कवाइकले आक्रामक बलिङ गर्दै चार विकेट लिए।
जवाफी ब्याटिङमा अमेरिकाका शायन जायागिरले ४९ रन बनाउँदा शुभम रञ्जानेले अर्धशतक पूरा गरे। मिलिन्दु कुमारले २९ रन जोडे पनि अन्य ब्याट्सम्यानले उल्लेख्य प्रदर्शन गर्न सकेनन्। पाकिस्तानका उस्मान तारिकले तीन विकेट लिँदै अमेरिकालाई सस्तैमा समेटे।
यो जितसँगै चार अंक जोडेको पाकिस्तान समूह ‘ए’को शीर्ष स्थानमा उक्लिएको छ। एक खेल खेलेको भारत दुई अंकसहित दोस्रो स्थानमा छ। दुई खेलमा एक जित र एक हार बेहोरेको नेदरल्यान्ड्स दुई अंकसहित तेस्रो स्थानमा रहँदा नामिबिया र अमेरिका अंकविहीन छन्। समूह ‘ए’मा पाकिस्तान, भारत, नेदरल्यान्ड्स, नामिबिया र अमेरिका सहभागी छन्।
