लिग लिडर बार्सिलोनाले स्पेनिस ला लिगामा शनिबार मार्योकाविरुद्ध ३–० को सहज जित हात पारेको छ।
क्याम्प नोउमा भएको खेलमा घरेलु टोली बार्सिलोनाको जितमा रोबर्ट लेवान्डोवस्की, लामिन यामल र मार्क बर्नलले एक–एक गोल गरे।
खेलको २९औँ मिनेटमा रोबर्ट लेवान्डोवस्कीले गोल गर्दै बार्सिलोनालाई अग्रता दिलाए। मार्कस रासफोर्डको प्रहारमा ड्यानी ओल्मोलाई लागेर आएको बललाई उनले मार्योका रक्षक र गोलकिपरलाई छक्याउँदै जाली चुमाए।
६१औँ मिनेटमा लामिन यामलले ड्यानी ओल्मोको पासमा बक्स बाहिरबाट उत्कृष्ट प्रहार गर्दै टोलीको अग्रता दोब्बर बनाए। निर्धारित समय समाप्त हुन सात मिनेट बाँकी रहँदा मार्क बर्नलले फर्मिन लोपेजको पासलाई सदुपयोग गर्दै एकल प्रयासमा तेस्रो गोल गरे।
यस जितसँगै बार्सिलोनाले २३ खेलबाट ५८ अंक जोड्दै शीर्ष स्थानमा आफ्नो अग्रता कायम राखेको छ। पराजित मार्योका समान खेलबाट २४ अंकसहित १५औँ स्थानमा छ।
