काठमाडौं । शिमरोन हेटमायरको अर्धशतकप्रेरित प्रदर्शनमा वेस्ट इन्डिजले आईसीसी ट्वान्टी–२० क्रिकेट विश्वकपमा स्कटल्यान्डसामु १८३ रनको लक्ष्य प्रस्तुत गरेको छ।
शनिबार कोलकातास्थित इडेन गार्डेन क्रिकेट रंगशालामा टस हारेर ब्याटिङमा उत्रिएको वेस्ट इन्डिजले निर्धारित २० ओभरमा पाँच विकेट गुमाउँदै १८२ रन बनायो।
वेस्ट इन्डिजका लागि शिमरोन हेटमायरले ६४ रनको महत्वपूर्ण योगदान दिए। उनले ३६ बलमा दुई चौका र छ छक्का प्रहार गरे। ओपनर ब्रान्डन किंगले ३० बलमा चार चौका र एक छक्काको सहयोगमा ३५ रन जोडे।
त्यस्तै, शेरफेन रदरफोर्डले २६ रन बनाए भने कप्तान शाई होप र रोभम्यान पावेलले क्रमशः १९ र २४ रनको योगदान दिए।
स्कटल्यान्डका लागि ब्राड क्युरीले दुई विकेट लिए। ओलिभर डेविडसन, सफयान शरिफ र माइकल लिस्कले समान एक–एक विकेट लिए।
वेस्ट इन्डिज र स्कटल्यान्ड प्रतियोगिताको समूह ‘सी’मा छन्। यस समूहमा नेपाल, इटाली र इंग्ल्यान्ड पनि सहभागी छन्।
भारत र श्रीलंकाको संयुक्त आयोजनामा सुरु भएको यस प्रतियोगितामा २० टिम सहभागी छन्। उद्घाटन खेलमा पाकिस्तानले नेदरल्यान्डलाई तीन विकेटले पराजित गर्दै विजयी सुरुआत गरेको छ।
