काठमाडौं – भारत यू–१९ विश्वकपको फाइनल पुगेको छ । बिहीबार भएको खेलमा अफगानिस्तानलाई सात विकेटले हराउँदै भारत यू–१९ विश्वकपको फाइनलमा पुगेको हो ।
भारतको जितमा आरोन जर्जले शतकीय इनिङ खेले । पहिले ब्याटिङ गरेको अफगानिस्तानले पूरै ५० ओभर खेल्दै चार विकेटको क्षतिमा ३१० रन बनाएको थियो । ३११ रनको लक्ष्य पछ्याएको भारतका लागि आरोनले शतक पूरा गर्दा वैभव सूर्यवंशी र कप्तान आयुष म्हात्रेले अर्धशतक हिर्काए ।
भारतले ४१ दशमलव १ ओभरमै तीन विकेटको क्षतिमा ३११ रन बनाउँदै अफगानिस्तानमाथि सात विकेटको जित निकालेको हो । यो जितसँगै भारत उपाधि नजिक पुगेको छ ।
भारतले फाइनलमा शुक्रबार इंग्ल्यान्डसँग प्रतिस्पर्धा गर्नेछ । पहिलो सेमिफाइनलमा अस्ट्रेलियालाई २२ रनले हराउँदै इंग्ल्यान्डले फाइनल यात्रा तय गरेको हो ।
