काठमाडौं – आईसीसी महिला टी–२० विश्वकप खेल्ने नेपालको सपना चकनाचुर भएको छ। ग्लोबल छनोटअन्तर्गत सोमबार कीर्तिपुरस्थित त्रिवि अन्तर्राष्ट्रिय क्रिकेट मैदानमा सम्पन्न निर्णायक खेलमा नेपाल स्कटल्यान्डसँग ७२ रनले पराजित भयो।
टस हारेर पहिले ब्याटिङ गरेको स्कटल्यान्डले निर्धारित २० ओभरमा सबै विकेट गुमाउँदै १४० रन बनायो। जवाफी ब्याटिङमा उत्रिएको नेपाली टोली भने कमजोर प्रदर्शन गर्दै १३.५ ओभरमै ६८ रनमा अलआउट भयो।
जित्नै पर्ने दबाबमा खेलेको खेलमा नेपालको ब्याटिङ पूर्ण रूपमा असफल रह्यो। कुनै पनि नेपाली ब्याटरले २० रन कटाउन सकेनन्। ओपनर बिन्दू रावल र रोमा थापाले सर्वाधिक १४–१४ रन बनाए भने रुविना क्षेत्रीले १० रन जोडिन्। अन्य ब्याटरहरू दोहोरो अंकमा पुग्न सकेनन्।
स्कटल्यान्डका लागि अबताह मक्सुदले तीन विकेट लिइन् भने क्याथरिन फ्रासर र क्याथरिन ब्राइसले दुई–दुई विकेट हात पारे।
यस हारसँगै समूह ‘बी’ बाट स्कटल्यान्ड, नेदरल्यान्ड्स र थाइल्यान्ड ‘सुपर–६’ चरणमा प्रवेश गरेका छन्। नेपाल भने जिम्बाब्वेसँगै समूह चरणबाटै बाहिरिएको छ।
यसअघि स्कटल्यान्डका लागि प्रियान्जा चटर्जीले अविजित ४५ रनको महत्वपूर्ण योगदान दिइन्। उनले २८ बलमा सात चौका प्रहार गरिन्। एलिसा लिस्टरले २२, सारा ब्राइसले १८ र मेगन म्याककोलले १७ रन जोडिन्।
नेपालतर्फ बलिङमा मनिषा उपाध्यायले चार विकेट लिँदै उत्कृष्ट प्रदर्शन गरिन्। उनले चार ओभरमा १७ रन मात्र खर्चिइन्। रुविना क्षेत्रीले तीन विकेट हात पारिन् भने अन्य तीन बलरले एक–एक विकेट लिए।
